ნეტგაზეთი • RU

„საავიაციო დაბომბვაში მოვყევით, მაგრამ ყველა გადავრჩით“ – ქართველი მებრძოლი უკრაინიდან

„საავიაციო დაბომბვაში მოვყევით, მაგრამ ყველა გადავრჩით,“ – ამბობს „ბათუმელებთან“ რომა ქათამაძე, ქართველი მებრძოლი უკრაინაში. ის აჭარის რეგიონში ცხოვრობს და იანვრიდან შეუერთდა კიევში „ქართულ ლეგიონს“.

„აქტიური საბრძოლო მოქმედებებია, მაგრამ ვცდილობთ ვიყოთ უსაფრთხოდ, ყველას ჩვენ-ჩვენი დავალება გვაქვს და ამას მივყვებით, უკრაინას აქვს შესაძლებლობა, რომ ამ აგრესიას გაუმკლავდეს, მუშაობს არტილერია, გვყავს სადესანტო და საავიაციო ძალები.

რაც მთავარია, უკრაინელი მებრძოლებიც და ჩვენც, ქართველები ვართ შემართებით, სულისკვეთებით, პანიკა არ იგრძნობა,“ – გვიყვება რომა ქათამაძე.

რომას მეუღლე უკრაინელია. „ჩემი მეუღლეც უკრაინაშია, ჩვენ არსად წასვლას არ ვაპირებთ, საკადრის პასუხს გავცემთ ყველა ერთად რუსეთს,“ – დარწმუნებულია რომა ქათამაძე.

ქართველი მებრძოლის ინფორმაციით, „ქართული ლეგიონის“ არც ერთი წევრები უკრაინაში ჯერჯერობით არ დაშავებულა.

„არავინ დაშავებულა, ჩვენ გადავამზადეთ უკრაინელები, სამოქალაქო პირები ამ სიტუაციისთვის. ახლა ჩვენ საბრძოლო პოზიციებზე ვართ,“ – დასძინა რომა ქათამაძემ.


მე-2 დღეა რუსეთმა უკრაინის წინააღმდეგ სრულმასშტაბიანი ომი დაიწყო. რუსული ჯარები უკრაინაში შეიჭრა სამი მხრიდან — აღმოსავლეთიდან (ბელარუსი), ჩრდილოეთიდან (დონეცკი-ლუგანსკი) და სამხრეთიდან (ყირიმი). პარალელურად, არტილერია და ავიაცია ბომბავს უკრაინის ქალაქებს, მათ შორის დედაქალაქ კიევს.

რუსეთის პრეზიდენტი ვლადიმერ პუტინი აცხადებს, რომ მათი მიზანი „უკრაინის დემილიტარიზაცია და დენაციფიკაციაა“. დღეს დილით დაიწყო კიევის დაბომბვაც.

უკრაინის პრეზიდენტი, ვოლოდიმირ ზელენსკი აცხადებს, რომ ის არსად წასვლას არ აპირებს.

რუსეთის სასტიკი თავდასხმა უკრაინაზე, დღე მეორე – განახლებადი [Live] 

ნეტგაზეთის მასალების სხვა გამოცემებში გადაბეჭდვის წესი
ავტორი