რუსეთმა 25 თებერვალს, გამთენიისას, კვლავ დაბომბა კიევი. როგორც დამოუკიდებელი უკრაინული მედიასაშუალება The Kyiv Independent-ი იტყობინება, რუსი სამხედროები კიევში, ობოლონის უბანში არიან, სადაც უკრაინელი სამხედროები ამ წუთებში ებრძვიან მათ.
უკრაინის ხელისუფლება ვებკამერის მფლობელებს კიევსა და მის ფარგლებს გარეთ მოუწოდებს: „შეწყვიტეთ ვიდეოების გამოქვეყნება და შეწყვიტეთ ონლაინსტრიმინგი! ნუ დაეხმარებით მტერს ჩვენი სამხედროების შესახებ ინფორმაციის მიღებაში“.
უკრაინის თავდაცვის სამინისტრომ მოქალაქეებს მოუწოდა არ დატოვონ საკუთარი სახლები და ასევე მოამზადონ მოლოტოვის კოქტეილები. ობოლონის უბანი კიევის ცენტრიდან 10 კილომეტრში მდებარეობს.
სოციალურ ქსელ twitter-ზე ვოლოდიმირ ზელენსკი წერს: „ფინეთის პრეზიდენტთან განვიხილე აგრესორთან დაპირისპირების საკითხი. ვაცნობე ჩვენი თავდაცვის, კიევის მზაკვრული დაბომბვის შესახებ. მადლობელი ვარ პარტნიორის 50 მილიონი დოლარის გამოყოფისთვის. დახმარება. ეს არის ეფექტური წვლილი ომის საწინააღმდეგო კოალიციაში. ჩვენ ვაგრძელებთ მუშაობას. სანქციები უნდა გავაძლიეროთ. გაზარდეთ თავდაცვის მხარდაჭერა უკრაინისთვის”.
თბილისის დროით, დილის 11 საათიდან 12 საათამდე შუალედში, თავდაცვის მინისტრის მოადგილემ ჰანნა მალიარმა თავის ოფიციალურ ფეისბუქგვერდზე გაავრცელა ინფორმაცია, რომ რუსმა დივერსიულ-სადაზვერვო ჯგუფმა უკრაინის შეიარაღებული ძალების ორი ავტომანქანა გაიტაცეს და ამ ავტომანქანებით მიუძღვებოდნენ რუსულ ტექნიკას კიევის ცენტრში. მინისტრის მოადგილემ ერთი საათის განმავლობაში განაახლა პოსტი და საზოგადოებას ამ ჯგუფის განეიტრალების შესახებ აცნობა.
მალევე უკრაინის შეიარაღებული ძალების გენერალურმა შტაბმა გაავრცელა ინფორმაცია ობოლონში მტრის ჯავშანტრანსპორტისა და სამხედრო მანქანების გადაადგილების შესახებ:
“მოქალაქეებს ვთხოვთ ინფორმირებას ტექნიკის გადაადგილების შესახებ!
გააკეთეთ მოლოტოვის კოქტეილები, გაანეიტრალეთ ოკუპანტი! მშვიდობიანი მოსახლეობა გაფრთხილდით! სახლიდან არ გახვიდეთ!”
ასევე, უკრაინის უსაფრთხოების სამინისტრო ავრცელებს ინფორმაციას, რომ “ტელეგრამის” მეშვეობით ცრუ ინფორმაციას ავრცელებს რუსეთი, გარკვეულ ლინკებზე გადასვლას სთხოვს მომხმარებელს, რის შემდეგაც წვდომას იღებს მომხმარებლის მონაცემებზე.
საფრანგეთი დაბლოკავს ყველა რუსულ ანგარიშებს, რომლებიც სანქციებს ექვემდებარება – საფრანგეთის ეკონომიკის სამინისტრო.
12:16 საათისთვის დიდი ბრიტანეთის თავდაცვის მინისტრმა თქვა: – პუტინი მთელი უკრაინის ხელში ჩაგდებას აპირებს.
გერმანიის ფინანსთა მინისტრმა რუსული ბანკების „სრული ბლოკადა“ და რუსეთთან ბიზნესის ვირტუალური შეწყვეტის შესახებ განაცხადა.
11:21 საათი, კიევის საქალაქო ადმინისტრაციის განცხადება: – „საჰაერო განგაშის“ სიგნალზე არ იმუშავებს სახმელეთო სადგურები „დნიპრო“, „ჰიდროპარკი“, „ლივობერეჟნა“, „დარნიცია“, „ჩერნიჰივსკა“, „ლისოვა“. ისინი არ არიან უსაფრთხო მგზავრების თავშესაფრად და გადასაყვანად. ჩვენ მოგიწოდებთ გადახვიდეთ სხვა თავშესაფრებში ან მიწისქვეშა სადგურებში. ასევე, ზოგიერთი სადგური მუშაობს შესვლის შეზღუდვით, რათა უზრუნველყოს ხალხის თანდათანობით გაყვანა და ხალხმრავლობის თავიდან აცილება.
11:47 საათი. ვოლოდიმირ ზელენსკი – „შედგა მოლაპარაკება პრემიერ-მინისტრ ბორის ჯონსონთან. ვაცნობე უკრაინის თავდაცვის კურსზე, აგრესორის მიერ კიევზე მზაკვრული თავდასხმების შესახებ. დღეს გვჭირდება პარტნიორების თავდაცვითი მხარდაჭერა, როგორც არასდროს. ჩვენ მოვითხოვთ რუსეთის ფედერაციის ეფექტურ წინააღმდეგობას. სანქციები კიდევ უფრო უნდა გამკაცრდეს“.
საქართველოს დროით დაახლოებით პირველი საათზე, უკრაინის პრეზიდენტმა twitter-ზე გამოაქვეყნა პოსტი, სადაც წერს, რომ ესაუბრა ურსულა ფონ დერ ლაიენს, ევროკომისიის პრეზიდენტს: “სანქციების ყველა შესაძლებლობა ჯერ არ არის გამოყენებული. უნდა გაიზარდოს ზეწოლა რუსეთზე. ვუთხარი ურსულა ფონ დერ ლაიენს. პრეზიდენტის მადლობელი ვარ, დამატებითი ფინანსური დახმარების გამოყოფისთვის”.
რუსეთმა უკრაინაში მასობრივი, სასტიკი ომი, 24 თებერვალს დაიწყო. უკრაინის მთავრობის ინფორმაციით, ომს უკვე ემსხვერპლა 137-ზე მეტი სამხედრო და სამოქალაქო პირი. მსხვერპლის შესახებ ინფორმაცია ზუსტდება.
