კიევის რეგიონში რუსეთის ჯარებმა სახელმწიფო საზღვარი გაარღვიეს. ამის შესახებ უკრაინის შინაგან საქმეთა სამინისტრო იუწყება.
მტრის სამხედრო ტექნიკა “ვილჩას” საგუშაგოზე შევიდა. მესაზღვრეებმა უკრაინელ სამხედროებთან ერთად ბრძოლა მიიღეს.
გარდა ამისა, ზალპებით სროლა განხორციელდა ჟიტომირის რაზმის მლაჩივკას სასაზღვრო დაცვის სამსახურის ადგილებზე.
“აღსანიშნავია, რომ სიტუაციიდან გამომდინარე, სასაზღვრო დანაყოფები გადანაწილდებიან სარეზერვო პოზიციებზე. ისინი მოქმედებენ უკრაინის შეიარაღებულ ძალებთან და ეროვნულ გვარდიასთან თანამშრომლობით”, – წერს უკრაინის შს სამინისტრო.
ამერიკული CNN -ის ინფორმაციით, დაიღუპა 40-მდე სამხედრო და 10-მდე სამოქალაქო პირი.
უკრაინის შს სამინისტრო იუწყება, რომ რუსეთი თავს დაესხა არა მხოლოდ საზღვარზე მყოფ ნაწილებს, არამედ უკრაინის ქალაქების ობიექტებსაც.
უკრაინის შს სამინისტროს ცნობით, დილით, კიევის რეგიონში უკრაინის ეროვნული გვარდიის სამხედრო ნაწილის ერთ-ერთი შენობა დაბომბეს. სავარაუდოდ სარაკეტო იარაღიდან. ინფორმაცია მსხვერპლის შესახებ ამ დროისთვის დასტურდება.
ამ დროისთვის, უკრაინის საგანგებო სიტუაციების სახელმწიფო სამსახურის ქვედანაყოფები ჩართულნი არიან ხანძრის ლიკვიდაციაში კიევის რეგიონში მდებარე ობიექტებზე, რომლებიც საჰაერო დარტყმებისას დაზიანდა.
—————————-
მთტავარ ფოტოზე: დაბა ჰოსტომელი, კიევის რეგიონი. წყარო: УНИАН – новости Украины
