ბათუმში 3 ათასამდე ოჯახი ავარიულ სახლში ცხოვრობს. ერთ-ერთი კორპუსი, რომელიც ავარიულია და მოსახლეობა უკვე შვიდ წელზე მეტია განსახლებას ითხოვს, მაიაკოვსკის 55 ნომერში მდებარეობს. მოსახლეობის თქმით, ამ კორპუსის კედლები და საძირკველიც დაზიანებულია. წუხელ, საქართველოში 6.2 ბალი მიწისძვრა დაფიქსირდა, რის შემდეგაც მოსახლეობამ ავარიული კორპუსი დატოვა და უკან დაბრუნებაზე უარი განაცხადა.
ამის შემდეგ მერიამ 15 ოჯახი სასტუმროებში გადაიყვანა, მათი ნაწილი კი ახლობლებთან გადავიდა.
მოსახლეობის თქმით, წლების წინ ქალაქის მერიაში მათ უთხრეს, რომ ბინებს აბუსერიძის ქუჩაზე ახალ კორპუსში მიიღებდნენ, რომლის მშენებლობაც 2018 წელს უნდა დასრულებულიყო, თუმცა მშენებლობა დღემდე არ დასრულებულა.
დაზიანებული კორპუსის მცხოვრებლებმა ხელშეკრულება კომპანია „რეალ მშენთან“ გააფორმეს, რომელსაც ბინებით უნდა დაეკმაყოფილებინა მესაკუთრეები. ახალი კორპუსი ნაწილობრივ აშენებულია, თუმც არ არის დასრულებული. მაშინ მოსახლეობა ამბობდა, რომ კომპანიას ბინების სანაცვლოდ მერიამ პროექტი გაზრდილი კოეფიციენტებით დაუმტკიცა, თუმცა მათ ბინები დღემდე არ მიუღიათ.
„ბათუმელებმა“ ქალაქის მერს, არჩილ ჩიქოვანს დღეს, 14 თებერვალსაც ჰკითხა, თუ რა გეგმა აქვს მერიას მაიაკოვსკის #55 ნომერში მცხოვრები მოსახლეობის ბინებით უზრუნველსაყოფად და რამდენად საკმარისია 80 მილიონი ლარი, რომელიც ბათუმის ავარიულ სახლებში მცხოვრები მოქალაქეების პრობლემების მოსაგვარებლად არის გათვალისწინებული მომდევნო 5 წლის განმავლობაში.
„როგორც იცით, ვახორციელებთ ავარიული სახლების პროგრამას, რომელიც სამი კატეგორიის პრობლემას მოიცავს. პირველ კატეგორიაში შედის მოსახლეობის ის ნაწილი, რომელიც ავარიულ სახლებში ცხოვრობს და სასწრაფოდ გადასაყვანია უსაფრთხო საცხოვრებელში, მეორე კატეგორიაშია სახლები, როლებიც გამაგრებას საჭიროებს, თუმცა არარენტაბელურია და მესამე კატეგორია გულისხმობს გამაგრებით სამუშაოებს. სამივე მიმართულებით აქტიურად ვმუშაობთ“, – ამბობს ჩიქოვანი.
მისი თქმით, კიდევ ერთხელ შემოწმდება თუ რამდენად დიდი ზიანი მიაყენა 13 თებერვალს ღამით მომხდარმა მიწისძვრამ საცხოვრებელ კორპუსს და დაიწყება მოლაპარაკებები, როგორც მოსახლეობასთან, ასევე ინვესტორთან.
კითხვაზე, თუ რამდენი ოჯახი საჭიროებს ახალ საცხოვრებელს ბოლო მონაცემებით, არჩილ ჩიქოვანი ამბობს, რომ ბათუმში უსაფრთხო საცხოვრებელი სულ ცოტა 3 ათას ოჯახს სჭირდება.
„რიგ მისამართებზე მიღებული გვაქვს გადაწყვეტილება. მაგალითად, რურუას ქუჩის #1-ელთან მიმართებაში დასკვნით ეტაპზეა მოქალაქეებთან შეთანხმება. გვაქვს კონკრეტული მისამართები და ამ მისამართებზეც მიმდინარეობს მონიტორინგის პროცესი.
დაახლოებით 97 მისამართზე გვაქვს მიღებული ექსპერტიზის დასკვნები, მერიაში 250 -ზე მეტი განცხადებაა შემოსული და მიმდინარეობს მათი დამუშავება“, – ამბობს ჩიქოვანი.
რაც შეეხება პროგრამით გათვალისწინებულ 80 მილიონ ლარს, რომელიც ავარიული სახლების რეაბილიტაციის პროგრამისთვისაა გათვალისწინებული, არჩილ ჩიქოვანი ამბობს, რომ „თუკი უფრო მეტის საჭიროება გაჩნდება, თანხას შემდეგ დაამატებენ“.
