ნეტგაზეთი • RU

ომიკრონის შემთხვევაში ვაქცინა არ მუშაობს, მე ვარ მაგალითი – ღარიბაშვილი

დღეს, 14 თებერვალს, პრემიერ-მინისტრმა ირაკლი ღარიბაშვილმა ე.წ. მწვანე პასპორტების გაუქმებასთან დაკავშირებით კომენტარი გააკეთა. მისი თქმით, მწვანე პასპორტები იმიტომ გააუქმა მთავრობამ, რომ ის აღარ მუშაობდა.

„რატომ დაკარგა აზრი მწვანე პასპორტების გამოყენებამ? დელტა შტამის და სხვა შტამების შემთხვევაში სხვა სიტუაცია იყო, მაგრამ ომიკრონის შემთხვევაში ვაქცინა არ მუშაობს. ვაქცინირებულ პირს ჩვეულებრივ ემართება ომიკრონი. მე ვარ აგერ ერთი მაგალითი.

მე მქონდა სხვა შტამი გასულ წელს, ორჯერ ვიყავი აცრილი „ფაიზერის“ ვაქცინით, მაგრამ მაინც დამემართა ომიკრონი.

თუმცა, მინდა გითხრათ, რომ ძალიან მსუბუქ ფორმებში მიმდინარეობს ვაქცინირებულ პირებში აღნიშნული ვირუსი, იმაზე უფრო მსუბუქად, ვიდრე ადრინდელი. ამიტომ დაკარგა აზრი მწვანე პასპორტის გამოყენებამ, ამიტომ ჩავთვალეთ საჭიროდ ამის გაუქმება“, – განაცხადა ირაკლი ღარიბაშვილმა მთავრობის სხდომაზე.

მეორე მხრივ, ღარიბაშვილი ამბობს, რომ უნდა გაგრძელდეს ვაქცინაციის წამახალისებელი კამპანია, განსაკუთრებით კი სოფლებში.

„ჩვენ წავახალისეთ 50 წელს ზემოთ პირებისთვის ბუსტერ დოზის გაკეთება 100 ლარით. ვფიქრობთ, რომ  კიდევ უნდა წახალისდეს და გაფართოვდეს ვაქცინაციის კამპანია. გარდა ამისა, ხელი უნდა შევუწყოთ ეკონომიკის სწრაფ ზრდას და აღდგენასაც“ – განაცხადა მან.

ჯანმოს ცნობით, ომიკრონის წინააღმდეგ ვაქცინის უმთავრესი მნიშვნელობა ჰოსპიტალიზაციის დაბალი მაჩვენებელია. ომიკრონის შემთხვევაში ბუსტერ ვაქცინის გაკეთების მნიშვნელობას უსვამს ხაზს ამირან გამყრელიძე, დაავადებათა კონტროლის ეროვნული ცენტრის დირექტორი.

stopcov.ge-ის მონაცემებით, საქართველოში ბოლო 24 საათში ჩატარდა 9 688 კვლევა ტესტით, კორონავირუსი დაუდასტურდა 4028 ადამიანს. ბოლო  24 საათში კორონავირუსით გარდაიცვალა 21 პაციენტი.

ამავე თემაზე: 

„მანქანის გაჩერებას ვცდილობთ კედელთან შეჯახებით“ – ინტერვიუ ექიმთან პანდემიის მართვაზე

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com