Batumelebi | 100 ათასი ლარი პეტრას ციხის გარკვეული უბნების კონსერვაციის პროექტისთვის 100 ათასი ლარი პეტრას ციხის გარკვეული უბნების კონსერვაციის პროექტისთვის – Batumelebi
ნეტგაზეთი • RU

100 ათასი ლარი პეტრას ციხის გარკვეული უბნების კონსერვაციის პროექტისთვის

აჭარის ბიუჯეტიდან 100 ათასამდე ლარი დაიხარჯება პეტრას ციხის გარკვეული უბნების სარეაბილიტაციო [კონსერვაცია და ნაწილობრივი რესტავრაცია] სამუშაოების საპროექტო დოკუმენტაციის შედგენაზე.

საპროექტო სამუშაოები მოიცავს ძეგლის ტერიტორიაზე არსებულ შემდეგ ობიექტებს: ნაეკლესიარი, შიდაციხის კედელი, აბანო, ე.წ. ცისტერნა, კოლექტორი/ სამეურნეო ნაგებობა და კოშკი.

პროექტის შედგენაზე ტენდერი აჭარის კულტურული მემკვიდრეობის დაცვის სააგენტომ გამოაცხადა. წინადადებების მიღება 2021 წლის 10 დეკემბერს დაიწყება და 13 დეკემბერს დასრულდება.

პირობის მიხედვით, ტენდერში გამარჯვებულმა „კვლევითი სამუშაოებისა და სარეაბილიტაციო [კონსერვაცია და ნაწილობრივი რესტავრაცია] სამუშაოების საპროექტო დოკუმენტაცია“, „კულტურული მემკვიდრეობის შესახებ“ საქართველოს კანონის შესაბამისად, სააგენტოს, ხელშეკრულების გაფორმებიდან 2022 წლის 30 აპრილამდე უნდა წარუდგინოს.

პეტრა / ფოტო ტენდერიდან

პეტრას ციხე მნახველებისთვის 2019 წლის აგვისტოში დაიკეტა და 2021 წლის მაისში გაიხსნა. არქეოლოგიური ძეგლის ვიზიტორებისთვის დაკეტვის მიზეზი სხვადასხვა ინფრასტრუქტურული სამუშაოები იყო.

ადმინისტრაციული შენობა/ვიზიტორთა ცენტრი, არქეოლოგიური მუზეუმი/სამუზეუმო სივრცეები, კინოსაპროექციო ოთახი, კაფე, სავალი ბილიკები, საპირფარეშო, მინის მოაჯირი ზღვის მხარეს, ადაპტირებული ლიფტები, ავტოპარკინგი – ამ ყველაფრის მოწყობაში აჭარის ბიუჯეტიდან 2 მილიონამდე ლარი დაიხარჯა.

 

რეაბილიტირებული პეტრას ციხე [ფოტო]

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com