“ISA AMIN” – ასე ჰქვია სრულმეტრაჟიან დოკუმენტურ ფილმს, რომელიც სტუდენტმა ნუკრი დუმბაძემ გადაიღო. ISA AMIN-ს ფილმის მთავარი გმირი საკუთარ თავს უწოდებს.
ფილმი პანტომიმის ვეტერან მსახიობსა და პოეტ-პერფორმერზეა, რომელიც უკვე 50 წელზე მეტია ამირან შალიკაშვილის სახელობის პანტომიმის თეატრში ცხოვრობს.
ISA AMIN-ი ახალგაზრდა მხატვრებს, მუსიკოსებს ხშირად თავშესაფრით და საკვებით უზრუნველყოფს, მის შესახებ ბევრმა არაფერი იცის.
კადრი ფილმიდან „Isa Amin”
ფილმის რეჟისორი ამბობს, რომ ეს საქართველოში პირველი ქართული სრულმეტრაჟიანი ფილმია სმარტფონით გადაღებული. მას სურდა ბევრი ადამიანისთვის გაეცნო კაცი, რომელიც ჩუმად ზრუნავს სხვებზე და შეუძლია ილაპარაკოს ყველაფერზე, რაც მას აწუხებს, ახარებს, მოსწონს, არ მოსწონს და ა.შ. კაცზე, რომელსაც მიაჩნია, რომ ყოველგვარ სიყვარულზე აღმატებული საქმის სიყვარულია, როცა თენდება და გიხარია იმის კეთება, რაც მხოლოდ შენი გასაკეთებელია.
ფილმი მთლიანად სმარტფონითაა გადაღებული (Galaxy S8 Plus) დამხმარე მოწყობილობების გარეშე, დამონტაჟებულიც სმარტფონშივეა. ფილმის მონტაჟზე ნიკოლოზ ხუროშვილმა იმუშავა.
„ეს იყო მცდელობა დამემტკიცებინა, რომ თუ კინო გიყვარს, მობილური მოწყობილობითაც შესაძლებელია კარგი ხარისხის პროდუქტის შექმნა. მთავარია ცოდნა, სწორი სარეჟისორო, ოპერატორული და შემოქმედებითი ხედვა. ჩემი დიდი სურვილი და მიზანია ქართულ კინემატოგრაფიულ სივრცეში განვითარდეს ე.წ. “Mobile Filmmaking”-ი, რაც კინოს სმარტფონით გადაღებას ნიშნავს.
კადრი ფილმიდან „Isa Amin”
თუ ადრე მაღალი ხარისხის ვიდეოს ან ფოტოს გადაღება მხოლოდ ძვირადღირებული, პროფესიონალური კამერით იყო შესაძლებელი, დღეს ეს შესაძლებლობა ადამიანთა უმრავლესობას უბრალოდ “ჯიბეში უდევს”.
სმარტფონები და პროფესიონალური პროგრამები, რომელთა გადმოწერაც და გამოყენებაც ნებისმიერ ადამიანს შეუძლია, იძლევა მაღალხარისხოვანი კონტენტის შექმნის საშუალებას.
ძალიან მაინტერესებს დოკუმენტური კინო, რამდენიმე წელი ვფიქრობდი სმარტფონით გადამეღო დოკუმენტური ფილმი და სულ რამდენიმე თვის წინ ასე დაიბადა “ISA AMIN”- ამბობს ფილმის ავტორი.
ნუკრიმ ფილმი 5 დღეში გადაიღო. დაამონტაჟა მინიმალისტური ვიდეოედიტორით. გადაღების დროს კადრის მონტაჟის, ფოკუსის მართვის, ფერებისა და კელვინების კორექციისთვის პროგრამა Filmic Pro გამოიყენა.
„მინდოდა მეჩვენებინა, რომ თუ შემოქმედებითი უნარები გაქვს, დღეს არსებობს ტექნიკური შესაძლებლობები ამის დასახვეწად“, – ამბობს ნუკრი დუმბაძე.
