Batumelebi | თბილისში ენმ-ს აქციაზე სპეცრაზმი და წყლის ჭავლის მანქანები გამოჩნდა თბილისში ენმ-ს აქციაზე სპეცრაზმი და წყლის ჭავლის მანქანები გამოჩნდა – Batumelebi
ნეტგაზეთი • RU

თბილისში ენმ-ს აქციაზე სპეცრაზმი და წყლის ჭავლის მანქანები გამოჩნდა

თბილისში „ერთიანი ნაციონალური მოძრაობის“ [ენმ] მიერ დაგეგმილი საპროტესტო აქცია 15:00 საათზე დაიწყო. აქციის ორგანიზატორების თქმით, დღეს მტკვრის ორივე სანაპიროს გადაკეტვა იგეგმებოდა, თუმცა ამ დროისთვის აქციის მონაწილეები მხოლოდ ერთ – მარჯვენა სანაპიროზე გადაადგილდებიან.

საპროტესტო აქციების პარალელურად შეინიშნება დიდი ოდენობით ყვითელი ავტობუსების გადაადგილება, სადაც სპეცრაზმელები სხედან. ავტობუსები მტკვრის მარჯვენა სანაპიროსკენ მოძრაობენ. ქუჩებში გადაადგილდებიან წყლის ჭავლის მანქანებიც.

ნაციონალური მოძრაობის ხელმძღვანელი ნიკა მელია ამბობს, რომ გაძლიერებული საპოლიციო ძალები ჰყავს დღეს შსს-ს მობილიზებული სხვადასხვა რეგიონიდან. პოლიციის კორდონი მიჰყვება უკან საპროტესტო მსვლელობასაც.

აციაზე მობილიზებულია პოლიცია

აქციის დაწყებამდე შსს-მ გაავრცელა განცხადება, რომელშიც ნათქვამია, რომ „საზოგადოებრივი წესრიგის აღდგენის მიზნით შინაგან საქმეთა სამინისტრო გამოიყენებს კანონით გათვალისწინებულ პროპორციულ ძალას და სპეციალურ საშუალებებს“.

საპროტესტო აქციის მონაწილეების თქმით, შსს-ს დაგეგმილი აქვს აქციის მონაწილეთა დაკავება. საპროტესტო აქციაზე ჯერჯერობით ინციდენტი არ ყოფილა. აქციის მონაწილეები მესამე პრეზიდენტის მიხეილ სააკაშვილის სამოქალაქო კლინიკაში გადაყვანას მოითხოვენ.

ქვეყნის მესამე პრეზიდენტი დაპატიმრებულია და უკვე 46 დღეა შიმშილობს.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com