თბილისში, რუსთაველის გამზირზე მიმდინარე აქციის ორგანიზატორმა, მომღერალმა გია გაჩეჩილაძემ (უცნობმა) ხელისუფლებას სთხოვა, ველოსიპედს, რომელიც „ძალიან დიდი ხანი დგას რესპუბლიკის მოედანზე“, ერთი „რული“ მაინც მოხსნას, რადგან ის ზუსტად მათ [ნაციონალური მოძრაობის] მმართველობას ასახავს.
„ეს ველოსიპედი, რომელიც ძალიან დიდი ხანია დგას რესპუბლიკის მოედანზე და ასახავს ზუსტად მათ მმართველობას, მათ რეჟიმს, რომელსაც ორი „რული“ აქვს და რომელიც არსად არ მიდის. აი, ეს არი…
ხომ იცით, სიმბოლოებს ძალიან დიდი მნიშვნელობა აქვს და ზუსტად გამოხატავს ეს ველოსიპედი მათ მმართველობას და მათი მმართველობის სიმბოლოა. მე გთხოვთ ისევე, როგორც გთხოვეთ წინა შემთხვევაში ღირსების დღის დაფუძნებასთან დაკავშირებით, ასევე ამ შემთხვევაში, რომ თუ ველოსიპედს არ გავიტანთ აქედან, ერთი „რული“ მაინც მოხსენით თქვენ მამაცხონებულებო, რომ წინ მაინც წავიდეთ. წინ.
ერთი „რული“ მოვხსნათ, იმიტომ, რომ ძალიან დიდი მნიშვნელობა აქვს ამ სიმბოლოებს“, – განაცხადა აქციაზე არტისტმა.
რუსთაველის გამზირზე, პარლამენტის წინ, 2007 7 ნოემბრის მოვლენებთან დაკავშირებით აქცია – „არ აგარევინებთ“ მიმდინარეობს. აქციის ორგანიზატორი საზოგადოებრივი მოძრაობა „აი იას“ დამფუძნებელი გია გაჩეჩილაძეა (უცნობი).
2007 წლის 7 ნოემბერი
სახალხო დამცველის ანგარიშების მიხედვით, 2007 წლის 7 ნოემბერს მშვიდობიანი საპროტესტო აქციის ძალისმიერი მეთოდების გამოყენებით დარბევისას სხეულის მძიმე დაზიანება მიიღო არაერთმა დემონსტრანტმა. აქციის დასაშლელად პირველად გამოიყენეს სპეციალური საშუალებები, მათ შორის, რეზინის ტყვიები, რაც იმ დროს მოქმედი კანონმდებლობით არ იყო ნებადართული.
სახალხო დამცველის 2007 წლის მეორე ნახევრის ანგარიშის მიხედვით, მტკიცებულებებით დასტურდება ცეცხლსასროლი იარაღის გამოყენებაც. იმავე დღეს ტელეკომპანია „იმედში“ სპეციალური დანიშნულების რაზმი შეიჭრა, რიც შედეგად ტელევიზია დროებით დაიხურა, მოგვიანებით კი ის მფლობელს წაართვეს.
