Batumelebi | თურქეთმა მარმარილოს ზღვას ახალი ეკოლოგიური სტატუსი მიანიჭა თურქეთმა მარმარილოს ზღვას ახალი ეკოლოგიური სტატუსი მიანიჭა – Batumelebi
ნეტგაზეთი • RU

თურქეთმა მარმარილოს ზღვას ახალი ეკოლოგიური სტატუსი მიანიჭა

5 ნოემბერს თურქეთის პრეზიდენტმა რეჯეპ ტაიპ ერდოღანმა მარმარილოს ზღვა სპეციალური დაცვის საჭიროების მქონე ზონად გამოაცხადა. 

ამ გადაწყვეტილების შემდეგად მარმარილოს ზღვაში დაწესებული იქნება ახალი ზომები ნებისმიერი საზღვაო საქმიანობისთვის, დაბინძურებისგან დასაცავად. 

თურქული გამოცემა „დეილი საბაჰის“ ცნობით, ახალ რეგულაციაში მითითებული ზონა მოიცავს სტამბოლის, კოჯაელის, იალოვას, ბურსას, ბალიკესირის, ჩანაქალეს და თექირდაღის წყლებს, ასევე ამ პროვინციების სანაპიროებს.

„ზღვა დღითიდღე იწმინდება და თევზი ბრუნდება. ჩვენ ვხედავთ ბიომრავალფეროვნებისა და ჟანგბადის დონის ნელ, მაგრამ სტაბილურ ზრდას,“ – განაცხადა თურქეთის გარემოს დაცვის, ურბანული დაგეგმარებისა და კლიმატის ცვლილების მინისტრმა – მურატ ქურუმმა. მან ისიც აღნიშნა, რომ ისინი მარმარილოს ზღვის დაბინძურების პოტენციურ წყაროებს სწავლობენ და დღემდე ჩატარდა 88 000-ზე მეტი შემოწმება. 

„ზღვის დაბინძურებისთვის ჩვენ ჯამში 13,5 მილიონი აშშ დოლარით (131,6 მილიონი თურქული ლირა) დავაჯარიმეთ 899 ბიზნესი და 99 საზღვაო სატრანსპორტო საშუალება, აგრეთვე  შევაჩერეთ 140 ბიზნესი დაბინძურების გამო,“ – განაცხადა მინისტრმა. 

„დეილი საბაჰის“ ცნობით, მინისტრმა ისიც დასძინა, რომ ამჟამად მარმარილოს ზღვაში ჩამდინარე წყლების მხოლოდ 46% ექვემდებარება სიღრმისეულ ბიოლოგიურ გაწმენდას და მომდევნო სამი წლის განმავლობაში ამ მაჩვენებლის 100%-მდე გაზრდა სურთ. 

„მარმარილოს ზღვაში  ჩამდინარე წყლების ხელახალი გამოყენების მაჩვენებელი 1,2%-დან 5%-მდე გაიზრდება. ეს ნიშნავს, რომ სტამბოლს (ქალაქი, რომლის მოსახლეობაც 15 მილიონზე მეტია) გადამუშავებული წყალი ერთი თვის მანძილზე ეყოფა,“ – ამბობს ქურუმი.

2021 წლის ზაფხულში მარმარილოს ზღვაში ლორწო წარმოიქმნა წყალმცენარის – ფიტოპლანქტონის გამრავლების შედეგად, რაც, სპეციალისტების თქმით, გამოწვეულია გლობალური დათბობისა და წყლის დაბინძურების გამო.

 

ნეტგაზეთის მასალების სხვა გამოცემებში გადაბეჭდვის წესი
ავტორი