ავტორი: ევა ართმელაძე
Bubbler App, იგივე „ბაბლერი“ ქართული სოციალური ქსელია საერთო ინტერესების მქონე ადამიანებისთვის, რომლის შექმნის იდეაც ავტორებს პანდემიის დროს დაებადათ.
„ბაბლერი“ სამმა ქართველმა ბიჭმა შექმნა: ლუკამ, ნიკამ და დაჩიმ.
ლუკა ხათრიძე ბიზნესისა და ტექნოლოგიების სტუდენტია და მარკეტინგის სფეროში, პროექტების მენეჯმენტის მიმართულებით მუშაობს. ბავშვობაში ხელოვნება და მუსიკა აინტერესებდა, რის გამოც თეატრალურზე ჩაბარებას ფიქრობდა, თუმცა 18 წლისამ ტექნოლოგიების შესწავლა დაიწყო და მიხვდა, რომ რაღაც უნდა შეეცვალა.
ნიკა სირაძე ჯერ კიდევ სკოლის მოსწავლეა, მისთვის Bubbler-ი პირველი სტარტაპია. სკოლაში სწავლის პარალელურად ნიკა ახლა Cyber Secure Central-ში, ვებ-დეველოპერის პოზიციაზე მუშაობს.
ლუკასა და ნიკას გუნდს მალე შეუერთდა დაჩი ტაბატაძეც. დაჩი არიზონას სახელმწიფო უნივერსიტეტში, ბიზნეს კომუნიკაციების ფაკულტეტზე სწავლობს და არიზონას მიკროსაფინანსო ორგანიზაციაში სტაჟირებას გადის.
„ყველა პროგრამას გააჩნია თავისი ღირებულება, რომელსაც ერგება მთლიანი პლატფორმა. ჩვენ ადამიანებს ვაძლევთ შესაძლებლობას ლოკაციების საშუალებით გააზიარონ მათი აქტივობები და ინტერესის მიხედვით იპოვონ მეგობრები. ეს არის Bubbler App-ის მთავარი, განმასხვავებელი ღირებულება სხვა პროგრამებისგან“ – გვიყვება ლუკა.
„ბაბლერის“ შექმნა დაახლოებით ერთი წლის წინ დაიწყეს.
„ბაბლერის“ ჯგუფი
მაშინ ლუკა და ნიკა Feedc-ში მუშაობდნენ ერთად, სამსახურიდან წამოსვლის შემდეგ პატარა პროექტებზე მუშაობა გადაწყვიტეს, ამ პერიოდს დაემთხვა პანდემია. როგორც გვიყვებიან, პანდემიამ გადამწყვეტი როლი ითამაშა მათი იდეების განხორციელებაზე მუშაობისთვის.
„გვინდოდა გაგვეზარდა გუნდი, ჩვენი ინტერესების ხალხი გვეპოვა. აღმოჩნდა, რომ ძალიან რთულია იპოვო ადამიანი, რომელიც შენს ღირებულებებს, ინტერესებს იზიარებს. ამან მოგვცა ბიძგი რეალურად, რომ დაგვეწყო Bubbler-ზე მუშაობა. აღმოვაჩინეთ, რომ მხოლოდ ჩვენ კი არ გვიჭირს, ბევრს უჭირს რეალურად იპოვოს მისი ინტერესების მქონე ადამიანი და კომუნიკაცია დაამყაროს“ – გვითხრა ლუკამ.
ბიჭებმა მონაწილეობა მიიღეს არიზონას უნივერსიტეტის კონკურსში – Venture devils, რაც სტარტაპებისთვის მნიშვნელოვანი წარმატებაა. მათ უკვე გაიარეს კონკურსის რამდენიმე ეტაპი და საბოლოო შედეგების მოლოდინში არიან. არიზონას სახელმწიფო უნივერსიტეტში “ბაბლერის” გუნდს თვენახევრის განმავლობაში სფეროს წამყვანი სპეციალისტები ეყოლებათ მენტორებად.
ქართული სოციალური ქსელის შემქმნელების თქმით, ამ ხნის განმავლობაში, მათთვის ძალიან მნიშვნელოვანი იყო „მედიალაბის“ მხარდაჭერა, სწორედ „მედიალაბის“ ორგანიზებული ჰაკათონის ფარგლებში შექმნეს Bubbler-ის ავტორებმა აპლიკაციის სატესტო ვერსია.
„ჯერ-ჯერობით სატესტო ვერსიაა, ვგეგმავთ აბსოლუტურად განსხვავებულ, თანამედროვე ადამიანზე მორგებული პლატფორმის შექმნას. დღევანდელი პლატფორმა იმისთვის ჩავუშვით, რომ დაგვედასტურებინა მისი არსებობა, რომ ნამდვილად არსებობს“ – ამბობს ლუკა.
ბიჭები გვიყვებიან, რომ მათ მიაღწიეს მიზანს და ახლა გაცილებით ძლიერი და საინტერესო პლატფორმის შექმნას გეგმავენ.
აპლიკაციის შექმნის საწყის ეტაპზე Bubbler-ის იდეის ავტორები ბევრ პრობლემასაც შეხვდნენ. როცა მათ წამოწყებაზე ჰყვებოდნენ, ბევრისთვის გაუგებარი იყო მათი იდეა.
ჩვენთან საუბრისას ბიჭებმა აღნიშნეს, რომ ბევრმა წინაღობამ ბიძგი მისცათ, რომ არ გაჩერებულიყვნენ. ერთი წლის განმავლობაში მოახერხეს ყველა ხარვეზის გამოსწორება. იხსენებენ, რომ ყველა, ვინც მანამდე მათი იდეის მომავალს ვერ ხედავდა, ახლა დახმარებას სთავაზობთ.
ასევე, ბიჭებს აქვთ კომპანია – Bubbler tech studio, რომელიც ამერიკულ მცირე და საშუალო ბიზნესებს უქმნის ვებ-საიტებს, ვებ-აპლიკაციებს და აპლიკაციებს Android-ისა და Play Store-სთვის.
„აქამდე ჩვენს თავს ჩვენ თვითონ ვაფინანსებდით, Bubbler tech studio-ს დახმარებით” – გვეუბნება დაჩი. Bubbler tech studio ამერიკულ მცირე და საშუალო ბიზნესებს უქმნის ვებ-საიტებს, ვებ-აპლიკაციებს და აპლიკაციებს Android-ისა და Play Store-სთვის.
ბიჭების თქმით ჯერ არ ჰქონიათ მნიშვნელოვანი ფინანსური მხარდაჭერა, მათ იმედი აქვთ, რომ სამომავლოდ შეძლებენ ფინანსების მოძიებას აქამდე არსებული იდეების დასახვეწად და ახალი იდეების ხორცშესასხმელად.
