Batumelebi | TV 25-ის ჟურნალისტი: მუქარის და ძალადობის მუხლებით გამოძიება დაიწყო TV 25-ის ჟურნალისტი: მუქარის და ძალადობის მუხლებით გამოძიება დაიწყო – Batumelebi
ნეტგაზეთი • RU

TV 25-ის ჟურნალისტი: მუქარის და ძალადობის მუხლებით გამოძიება დაიწყო

„გუშინ მომხდარ შემთხვევაზე გამოძიება დღეს დაიწყეს, მხოლოდ ჩვენი მიმართვის შემდეგ,“ – ამბობს TV 25-ის ჟურნალისტი თეო ფუტკარაძე, რომელსაც გუშინ, 30 ოქტომბერს, არჩევნების მეორე ტურის გაშუქების დროს თავს დაესხნენ.

ჟურნალისტი გამომძიებლებმა დღეს გამოკითხეს და უთხრეს, რომ გამოძიება დაწყებულია, თუმცა შინაგან საქმეთა სამინისტრო ამ დრომდე ოფიციალურად არ ადასტურებს გამოძიების დაწყებას TV 25- ის ჟურნალისტზე თავდასხმის შესახებ.

შემთხვევა გუშინ, 31 ოქტომბერს, წერეთლის ქუჩაზე, 73-ე საარჩევნო უბნის წინ მოხდა – ჟურნალისტმა მიკროავტობუსში კოორდინატორების მობილიზაცია შენიშნა და მათ ღია სივრცეში კითხვები დაუსვა.

„მითხრეს, რომ იყვნენ „ქართული ოცნებიდან“, სიტყვიერი შეურაცხყოფა მომაყენეს და ხელი მკრეს, ერთხელ ისე მიბიძგეს, ოპერატორმა შემაკავა, თორემ დავეცემოდი… თავდასხმის მიზეზი იყო კითხვები. გაღიზიანდნენ, რატომ დავსვი კითხვები ამომრჩევლების მობილიზებაზე,“ – ამბობს თეო ფუტკარაძე.

ჟურნალისტის ინფორმაციით, გამოძიება დაიწყო მუქარის და ჯანმრთელობის ნაკლებად მძიმე დაზიანების მუხლებით.

„ჩემი სურვილი იყო, გამოძიება დაწყებულიყო პროფესიული საქმიანობის ხელშეშლის მუხლითაც, მაგრამ ეს ასე არ მოხდა,“ – დასძინა თეო ფუტკარაძემ „ბათუმელებთან“.

არჩევნების მეორე ტურის შემდეგ გამოძიება სავარაუდო დანაშაულის 8 ფაქტზე დაიწყო, მათ შორის, ჟურნალისტებზე ძალადობის გამო.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი