ავტორი: ევა ართმელაძე
დღეს, 30 ოქტომბერს, საქართველოს პრემიერ-მინისტრმა, ირაკლი ღარიბაშვილმა აღნიშნა, რომ დღეს მიმდინარე თვითმმართველობის არჩევნების მეორე ტურზე იყო პროვოკაციის მცდელობები, მათ შორის, ზუგდიდშიც:
„ჩვენ, რა თქმა უნდა, არც ერთ პროვოკატორს არ მივცემთ უფლებას, რომ არეულობა და შფოთვა, ქაოსი შეიტანონ, ყველას ადგილზე, მნიშვნელობა არ აქვს რომელი პარტიის წარმომადგენელი იქნება, კანონის შესაბამისად გაეცემა პასუხი,“ – განაცხადა ღარიბაშვილმა.
მან ასევე კიდევ ერთხელ ისაუბრა მიხეილ სააკაშვილის შესახებაც.
„პატიმარ სააკაშვილს ყველანაირი მომსახურება ეწევა, ყველანაირი აბსოლუტურად, მას აქვს სრული კომფორტი შექმნილი ციხეში და რა თქმა უნდა, პენიტენციური სამსახური ყველაფერს აკეთებს იმისთვის, რომ მას 24-საათიანი მომსახურება გაუწიოს“.
საქართველოს მესამე პრეზიდენტი მიხეილ სააკაშვილი საქართველოში პირველ ოქტომბერს დააკავეს და მას შემდეგ შიმშილობს. ხელისუფლება კატეგორიულად ეწინააღმდეგება მის გადაყვანას სამოქალაქო ტიპის სამკურნალო დაწესებულებაში. თავად სააკაშვილი კი უარს ამბობს ციხის საავადმყოფოში გადასვლაზე, რადგან მიიჩნევს, რომ მას იქ საფრთხე ემუქრება.
