Batumelebi | გააკეთეთ განმარტება, რატომ არ შემოუშვით უკრაინელი ჟურნალისტები – მიმართვა მთავრობას გააკეთეთ განმარტება, რატომ არ შემოუშვით უკრაინელი ჟურნალისტები – მიმართვა მთავრობას – Batumelebi
RU | GE  

გააკეთეთ განმარტება, რატომ არ შემოუშვით უკრაინელი ჟურნალისტები – მიმართვა მთავრობას

კოალიცია „მედია ადვოკატირებისთვის“ მოუწოდებს საქართველოს მთავრობას, განმარტოს, რატომ არ შემოუშვეს საქართველოში უკრაინელი ჟურნალისტები.

„კოალიცია მედიის ადვოკატირებისთვის მოუწოდებს საქართველოს მთავრობას, დაუყოვნებლივ გააკეთოს განმარტებები საქართველოს საზღვარზე ჟურნალისტების არ შემოშვების თაობაზე და პატივი სცეს მედიის წარმომადგენელთა უფლებებს შეასრულონ თავიანთი პროფესიული მოვალეობა“ – აცხადებს კოალიცია „მედია ადვოკატირებისთვის“.

დღეს, 27 ოქტომბერს, უკრაინელი ჟურნალისტი დიმიტრი გორდონი საქართველოში არ შემოუშვეს. გორდონი კიევიდან თბილისში დილით გამოფრინდა, მაგრამ ქვეყანაში შემოსვლის ნებართვა ვერ მიიღო.

„ახლახან ოფიციალურად განმიცხადეს, რომ საქართველოში შემოსვლა აკრძალული მაქვს. მიზეზი არ დაუსახელებიათ. ცალსახად ვუკავშირებ ამ ფაქტს იმას, რომ უკრაინის საგარეო საქმეთა სამინისტრომ მიმართა საქართველოს საგარეო საქმეთა სამინისტროს თხოვნით, ორგანიზება გაუკეთოს ჩემს შეხვედრას მიხეილ სააკაშვილთან რუსთავის ციხეში. რაც მოხდა, საერთაშორისო სკანდალი და საქართველოს ხელისუფლების სირცხვილია”, — წერს გორდონი.

დიმიტრი გორდონის გარდა საქართველოში არ შემოუშვეს არც მისი მეუღლე, რედაქტორი ალისია ბაცმანი.

შს სამინისტროს ჯერ არ განუმარტავს, რა მიზეზით არ შემოუშვეს საქართველოში უკრაინელი ჟურნალისტი.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com