Batumelebi | ეს ყველასთვის არის გაკვეთილი – თურნავა ბათუმის ტრაგედიაზე ეს ყველასთვის არის გაკვეთილი – თურნავა ბათუმის ტრაგედიაზე – Batumelebi
ნეტგაზეთი • RU

ეს ყველასთვის არის გაკვეთილი – თურნავა ბათუმის ტრაგედიაზე

ეკონომიკისა და მდგრადი განვითარების მინისტრმა, ნათია თურნავამ, დღეს, 12 ოქტომბერს, ჟურნალისტებთან ბათუმში მომხდარი ტრაგედიის შესახებ ისაუბრა და განაცხადა, რომ მთავრობა მუნიციპალიტეტების დონეზე სამშენებლო რეგულაციების გამკაცრებაზე ფიქრობს.

„ეს ფაქტი არის დამაფიქრებელი. თუმცა ესა თუ ის ადამიანი რას გააკეთებს თავის სარდაფში, ვერ გავიგებთ, თუ არ შეატყობინებს ის შესაბამის სტრუქტურებს. ამიტომ თითოეულ ადამიანს მართებს წინდახედულება და პასუხისმგებლობა და ეს ყველასთვის არის გაკვეთილი, მაგრამ ჩვენ დავიწყეთ იმაზე მუშაობა, რომ გავაფართოვოთ მუნიციპალური სამსახურების, მაგალითად, მუნიციპალური ინსპექციის უფლებამოსილებები, რომ მათ ჰქონდეთ უფრო მეტი წვდომა ინფორმაციაზე. მოქალაქეებმაც უფრო მეტად უნდა ვიფიქროთ საკუთარ უსაფრთხოებაზე, მეზობლების უსაფრთხოებაზე და ჩვენ შესაბამის ცვლილებს განვახორციელებთ“, – ამბობს თურნავა.

8 ოქტომბერს ბათუმში, 26 მაისის ქუჩაზე, საცხოვრებელი კორპუსის ერთი სადარბაზო ჩამოინგრა. ნანგრევებში 10 ადამიანი მოყვა, 9 მათგანი, მათ შორის, 3 ბავშვი დაიღუპა.

წინასწარი ინფორმაციით, საცხოვრებელი კორპუსის პირველ სართულზე მიმდინარეობდა სამშენებლო სამუშაოები, რის შედეგადაც, სავარაუდოდ, მზიდი კედელი დაზიანდა და შენობა ჩამოიშალა. ამ დროისთვის დაკავებულია ბინის მეპატრონე და ორი მუშა.

მიმდინარეობს შენობის ექსპერტიზა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com