პრემიერ-მინისტრმა ირაკლი ღარიბაშვილმა დღეს, 14 სექტემბერს, „ერთიანი ნაციონალური მოძრაობა“ დაადანაშაულა სავარაუდოდ სუსიდან გაჟონილი ფაილების გავრცელებაში.
„ეს ადამიანები აწყობენ ასეთ დესტაბილიზაციას და ცდილობენ მუდმივი პროვოკაციებით ჩვენი ხალხის დაძაბვას. მაგრამ ეს არ არის 90-იანი წლები, როცა კრიმინალები მართავდნენ ქვეყანას. ეს არ არის 2003 წელი და არ ეგონოს და ილუზია არ ჰქონდეს ვიღაცას.
…ყოველ დღე ასმენინებენ თავიანთი პროვოკაციული ტელევიზიებით ასეთ უშინაარსო, გაუგებარ, არავისთვის საინტერესო შეთხზულ ისტორიებს.
…ეს არის მტრობა სახელმწიფოს წინააღმდეგ, მტრობაა, როცა მიზანმიმართულად ცდილობ, სახელმწიფო უსაფრთხოების სამსახურის წინააღმდეგ ასეთ ბინძურ პროვოკაციას რომ გეგმავ,“ – თქვა ღარიბაშვილმა.
13 სექტემბერს საქართველოში მედიასაშუალებებმა მიიღეს ბმული ჰაკიმ ფაშას სახელით და სათაურით – „სუსის კომპრომატი საპატრიარქოს წინააღმდეგ“.
ბმულზე ასობით ფაილია, რომლებშიც მოცემულია პირადი ინფორმაცია მართლმადიდებელი სასულიერო და სამოქალაქო პირების საჯარო და პირადი ცხოვრების, სექსუალური კავშირების შესახებ. ინფორმაციას თან ერთვის ფოტოები, პირადი ნომრები, ტელეფონის ნომრები.
სისტემურობიდან და შინაარსიდან გამომდინარე, ფაილები, სავარაუდოდ, სუსიდან არის გაჟონილი და 2014 წლიდან 2021 წლის ჩათვლით თარიღდება.
ზოგიერთი ცნობა შეიცავს სისხლის სამართლის დანაშაულის ნიშნებს, მათ შორის, საუბარია სასულიერო პირების მხრიდან სექსუალური კონტაქტის დამყარებაზე არასრულწლოვნებთან, ქრთამის აღებაზე პატიმართა შეწყალებაზე შუამდგომლობის სანაცვლოდ და სხვა.
