Batumelebi | პატიმრების 66 % ვაქცინირებულია ერთხელ, 55 % ორჯერ – გაბუნია პატიმრების 66 % ვაქცინირებულია ერთხელ, 55 % ორჯერ – გაბუნია – Batumelebi
RU | GE  

პატიმრების 66 % ვაქცინირებულია ერთხელ, 55 % ორჯერ – გაბუნია

„გამიჭირდება ამ ციფრის დასახელება, მაგრამ სიტუაცია არის სრულად კონტროლირებადი,“ – უპასუხა დღეს, 30 აგვისტოს, ჟურნალისტებს ჯანდაცვის მინისტრის მოადგილე თამარ გაბუნიამ პატიმრების კორონავირუსით ინფიცირებასთან დაკავშირებით. ჟურნალისტებმა მინისტრის მოადგილეს ჰკითხეს, იცოდა თუ რამდენი პატიმარია ინფიცირებული, რადგან ადვოკატების თქმით, ათეულობით პატიმარია კორონავირუსით დაავადებული.

პატიმრის კორონავირუსით ინფიცირების შესახებ „ბათუმელებს“ ერთ-ერთი პატიმრის დედაც ესაუბრა. მისი თქმით, პატიმარი უკვე გადაიყვანეს კლინიკაში.

„მაისის ბოლოდან ვმუშაობთ პენიტენციურ სისტემაში, ერთხელ ვაქცინირებულია ამ დროისთვის პატიმრების 66 პროცენტი, ხოლო ორჯერ ვაქცინირებულია 55 პროცენტზე მეტი, თანამშრომლების ვაქცინაცია დაიწყო აპრილის ბოლოდან. თანამშრომლების 80 პროცენტი ერთხელ ვაქცინირებულია, ხოლო ორჯერ ვაქცინირებულია – 62 პროცენტი. ამგვარი ვაქცინაციის პირობებში ინფექციის გადადების ალბათობა არის დაბალი,“ – აღნიშნა თამარ გაბუნიამ, ჯანდაცვის მინისტრის მოადგილემ.

თამარ გაბუნიას თქმით, პატიმრების მისაღებად ასევე მზადაა კონკრეტული კლინიკები, თუმცა რამდენ პატიმარს დასჭირდა კლინიკაში გადაყვანა, ეს ციფრი მინისტრის მოადგილეს არ დაუსახელებია.

რამდენი ბრალდებული  და მსჯავრდებულია ინფიცირებული covid 19 – ით, რამდენს დასჭირდა კლინიკაში გადაყვანა და როგორ მოხდა პატიმრების ინფიცირება მკაცრად კონტროლირებად ტერიტორიაზე? – ამ კითხვებით პენიტენციური სამსახურის პრესცენტრს დღეს დილით მივმართეთ, თუმცა ამ დრომდე პასუხი არ მიგვიღია.

ნეტგაზეთის მასალების სხვა გამოცემებში გადაბეჭდვის წესი
ავტორი