საქართველოს ჯანდაცვის მინისტრის, ეკატერინე ტიკარაძის განცხადებით, კოვიდკლინიკებში მყოფი პაციენტების 95 პროცენტი აუცრელია კორონავირუსზე.
„მოქალაქეების საკმაოდ დიდი რაოდენობაა აცრილი და ჩვენ გავაკეთეთ მოკვლევა, რომ დაგვედგინა, როგორია წილი ჰოსპიტალში მოხვედრილი პაციენტების, ვინც უკვე იყვნენ აცრილი ერთი ან ორი დოზით.
გამოიკვეთა, რომ ერთი დოზით აცრილებში, განურჩევლად ვაქცინისა, კლინიკაში მოხვდა მხოლოდ 2,85 პროცენტი, ხოლო ორი დოზით აცრილი პაციენტების – 2,13 პროცენტი.
კლინიკაში დღესდღეობით მკურნალობას გადის 95 პროცენტი იმ ადამიანებისა, რომლებიც არ არიან აცრილი არც ერთი დოზით“ – განაცხადა ეკატერინე ტიკარაძემ დღეს, 17 აგვისტოს.
მან მოქალაქეებს ვაქცინაციისკენ მოუწოდა:
„მე კიდევ ერთხელ ვთხოვ ჩვენს ყველა მოქალაქეს, გააქტიურდნენ, ჩაერთონ ვაქცინაციაში და გამოიყენონ ნიღაბი ყველგან, სადაც შეიძლება ჰქონდეთ კონტაქტი სხვა ადამიანთან“.
დღეს ცნობილი გახდა, რომ საქართველოში სავალდებულო ხდება პირბადის ტარება ღია სივრცეშიც.
