ავტორი: ნინო ჩანადირი, საერთაშორისო ურთიერთობების მაგისტრი
___
ძალიან პატარა რომ ვიყავი, სანამ კითხვას ვისწავლიდი, ამბებს ბებო მიყვებოდა ხოლმე. ზღაპრებს, იგავ-არაკებს, ლექსებს მასწავლიდა… რაც უფრო გრძელი იყო ამბავი, მით უფრო მეტად მომწონდა და მსიამოვნებდა მოსმენა. ყოველ საღამოს ახალი ამბის მოყოლას ვთხოვდი და მასაც მოსაყოლი რომ აღარ ჰყოფნიდა, ახლებს იგონებდა. თუ ისე მოხდებოდა, რომ ერთსა და იმავე ამბავს მომიყვებოდა, ის რომ ჩერდებოდა, მე ვაგრძელებდი.
სკოლაში შესვლის და კითხვის სწავლიდან მალევე თავად დავიწყე წიგნების კითხვა. კითხვა დღემდე ჩემი საყვარელი საქმიანობაა. ვთვლი, რომ წიგნების კითხვა ადამიანს ისეთი რამეების განცდის შესაძლებლობას აძლევს, რაც შეიძლება ვერასოდეს განეცადა. ამიტომ, ამ გამოცდილების მიღების შესაძლებლობას ხშირად ვიყენებ.
ჩემი საყვარელი სუნი, ძველი წიგნების ფურცლების სუნია.
როდესაც მეკითხებიან, თუ ვინაა ჩემი საყვარელი ავტორი, ბევრს არ ვფიქრობ, ოთარ ჭილაძეს ვასახელებ.
პირველად მისი წიგნი რომ ავიღე ხელში, სკოლა ახალი დასრულებული მქონდა. ამ წიგნს „გზაზე ერთი კაცი მიდიოდა“ ერქვა. ამის შემდეგ ვეღარ გავჩერდი და მიყოლებით წავიკითხე ყველა მისი რომანი. გავმდიდრდი! ყოველი მისი წიგნის დასრულების შემდეგ იმაზე მდიდარი ვიყავი ვიდრე წიგნის დაწყებამდე. მე ამ ავტორთან სიახლოვემ სამყაროს შეგრძნება მასწავლა. გქონიათ განცდა, რომ წიგნიდან სურათები ცხოვრებაში ცოცხლდება, თუ რაიმე ასოციაციურს წააწყდებით შემთხვევით? ჭილაძის წიგნებმა ჩემი ცხოვრება ასეთი სურათებით აავსო.
ძალიან მინდა, რაც შეიძლება ბევრ ბავშვს (და დიდსაც) ჰქონდეს შესაძლებლობა წიგნების საოცარ სამყაროში იმოგზაუროს. გაიცნოს პერსონაჟები, დააკვირდეს და ისწავლოს მათგან.
წიგნები ცხოვრებას აფერადებს. წიგნების კითხვა უამრავ უნარს ავითარებს და მინდა ეს შესაძლებლობა აჭარის მაღალმთიან სოფლებში მცხოვრებ ბავშვებს არ მოაკლდეთ.
დიდი მადლობა „ბათუმელებს“ ამ მნიშვნელოვანი წამოწყებისთვის და დარწმუნებული ვარ, მიზანი მალე იქნება მიღწეული!
დააკლიკე და შეავსე ცარიელი თაროები სოფლის ბიბლიოთეკებში
ან გადმორიცხეთ ჩვენს ანგარიშზე
სს “საქართველოს ბანკი”, ბანკის კოდი:BAGAGE22;
ანგარიშის ნომერი:
GE88BG0000000103117598
ა(ა)იპ თავისუფალ ჟურნალისტთა სახლი
