Batumelebi | მთავრობა ბათუმში გამწვანებულ ნაკვეთს ყიდის მშენებლობის პირობით  მთავრობა ბათუმში გამწვანებულ ნაკვეთს ყიდის მშენებლობის პირობით  – Batumelebi
RU | GE  

მთავრობა ბათუმში გამწვანებულ ნაკვეთს ყიდის მშენებლობის პირობით 

აჭარის ფინანსთა და ეკონომიკის სამინისტრო ბათუმში, შემოერთებულ ტერიტორიაზე [დაბა ხელვაჩაური] გამწვანებულ მიწის ნაკვეთს მშენებლობის პირობით ყიდის. ნაკვეთის ფართობი 473 კვ,მეტრია.

აუქციონის პირობის მიხედვით, ხელშეკრულების გაფორმებიდან 12 თვის ვადაში მყიდველმა ამ ტერიტორიისთვის დაშვებული ფუნქციის მატარებელი შენობა [გარდა საცხოვრებელი სახლების ან აპარტამენტებისა] არანაკლებ 36 თვეში უნდა აამოქმედოს. ასევე უნდა აიღოს არანაკლებ 200 000 ლარის ინვესტიციის განხორციელების ვალდებულება.

ქონების საწყისი ფასი 166 000 ლარია. აუქციონის პიროაბის მიხედვით, მყიდველს ამ თანხის ერთიანად გადახდა არ მოუწევს. 2021 წლის დეკემბრამდე მას შეუძლია დაფიქსირებული თანხის მხოლოდ 25%- გადაიხადოს. დარჩენილი საპრივატიზებო საფასურის გადახდა კი 2022 წლის 1-ელ დეკემბრამდე უნდა შეძლოს.

გარდა ამისა, მყიდველმა  ნასყიდობის ხელშეკრულების გაფორმებიდან არაუგვიანეს 2 თვის ვადაში, უპირობო და გამოუხმობი საბანკო გარანტია უნდა წარუდგინოს სამინისტროს 10 000  ლარზე, რომლის ვადაც არანაკლებ 2 თვით უნდა აღემატებოდეს საინვესტიციო ვალდებულების შესრულების ვადას.

ყვითლად მონიშნულია გასაყიდი ტერიტორია, მონიშნულის შუაში არსებული შენობა კი სპს „დუმბაძეს“ ეკუთვნის

სამინისტრო ასევე წერს, რომ გასაყიდი ქონება დაკავებულია მესამე პირის მიერ, ფლობის დამადასტურებელი დოკუმენტის გარეშე. ქონების ნაწილზე განთავსებულია მრავალწლიანი ნარგავები და დაბალი ძაბვის გადამცემი ელექტრო ბოძი. ასევე არის შენობა, რომელშიც ფუნქციონირებს მაღაზია და სალონი.

აუქციონი 11 აგვისტოს უნდა დასრულდეს.

ბათუმის მერია აუქციონის წესით რამდენიმე ნაკვეთის ასევე ყიდის. საზღვაო ნავსადგურთან ახლოს, გოგებაშვილის #84-ში მდებარე 13 540 კვ.მეტრის გარდა, საპრივატიზებო ობიექტების ნუსხაში შეიტანეს სვიშევსკის ქუჩაზე მდებარე 1 152 კვ.მეტრი ნაკვეთი გზის პირას. შესაბამისი განკარგულების პროექტის მიხედვით, მერია ამ ქონებას პირობიან აუქციონზე გაიტანს და საწყისი ფასი 160 000 იქნება.

პირობის თანახმად, საპრივატიზებო საფასური გადახდა შესაძლებელია ნასყიდობის ხელშეკრულების გაფორმებიდან 3 თვეში.

მონიშნულია სვიშევსკის ქუჩაზე გასაყიდი მიწის ნაკვეთი

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან