ბათუმის განაშენიანების გეგმის [გენგეგმა] მომზადებაზე კონკურსი ამჯერად შედგა: სახელმწიფო შესყიდვების სააგენტოს ვებგვერდზე ატვირთული დოკუმენტების მიხედვით, გენგეგმის მომზადებაზე „სითი ინსტიტუტი საქართველო“ იმუშავებს. ორგანიზაციას 2 მილიონ 115 000 ლარს გადაუხდიან.
„სითი ინსტიტუტი საქართველო“ 2015 წელსაა დაფუძნებული ა(ა)იპ- ია. მას მამუკა სალუქვაძე და არჩილ ბარბაქაძე ხელმძღვანელობენ.
ამ დროისთვის კონკურსში გამარჯვებულ კომპანიასთან ხელშეკრულება გაფორმებული არ არის. 15 დღის ვადაში „სითი ინსტიტუტი საქართველომ“ შემსყიდველს საბანკო გარანტია უნდა წარუდგინოს, რის შემდეგაც ორგანიზაციას ხელშეკრულებას გაუფორმებენ.
კონკურსში სამი კომპანია მონაწილეობდა, მათ შორის იყვნენ „ПРОАРХ“ АД-ი და შპს „ნიუ სითი დეველოფმენთი“.
კონკურსით გათვალისწინებული მოთხოვნების მიხედვით, გამარჯვებულმა კომპანიამ უნდა მოამზადოს ბათუმის მუნიციპალიტეტის სივრცითი განვითარებისა და განაშენიანების მართვის დოკუმენტი, რომელიც მომავალში ბათუმის გენგეგმის ძირითადი ნაწილი იქნება.
კონკურსის პირობები განსაკუთრებულ მოთხოვნებს აწესებს გამოცდილებასთან დაკავშირებით, პრეტენდენტებს უნდა წარადგინონ იმ პირების სახელები და გვარები, რომლებიც ორგანიზაციასთან ერთად ბათუმის სივრცითი დაგეგმარების დოკუმენტს მოამზადებენ. ასევე მათი გამოცდილების დამადასტურებელი დოკუმენტები.
გამარჯვებულ ორგანიზაციას ამ მიმართულებით დიდი გამოცდილება აქვს, „სითი ინსტიტუტი საქართველომ“ მოამზადა თბილისის განვითარების გენერალური გეგმაც.
შესყიდვების სააგენტოს ვებგვერდზე გამოქვეყნებული ინფორმაციით, გამარჯვებული ორგანიზაციის მიერ წარდგენილ ჯგუფში, რომლებიც გენგეგმაზე იმუშავებენ, არინ ყოფილი საჯარო მოხელეებიც.
