ნეტგაზეთი • RU
ზვიად ქორიძე ფოტო: მანანა ქველიაშვილი/ბათუმელები

მედიის გარეშე დარჩენილი საზოგადოების მართვა მარტივია ხელისუფლებისთვის – ქორიძე

„ხელისუფლებას აღარ სურს, რომ მედია არსებობდეს, ინფორმაციით ამარაგებდეს და აძლიერებდეს საზოგადოებას. ეს უკვე იმის მანიშნებელია, რა უნდა ამ ხელისუფლებას“ – განაცხადა დღეს, 12 ივლისს, თბილისში გამართულ საპროტესტო აქციაზე ჟურნალისტმა ზვიად ქორიძემ.

„ხელისუფლებას ამ შემთხვევაში უნდა ერთადერთი რამ, ავტორიტარიზმი, მეტი არაფერი. მისი ამოცანაა საზოგადოებას პირველ რიგში გაუჩინოს უნდობლობა მედიის მიმართ, დაარწმუნოს ყველა ხილული თუ უხილავი მექანიზმებით, რომ ეს მედია არის მავნე, არის პოლიტიკურად ანგაჟირებული და მერე უთხრას – დაუპირისპირდი, არ მიიღო ეს მედია.

საზოგადოების რაღაც ნაწილი, დროის გარკვეულ მონაკვეთში შეიძლება დაჰყვეს ხელისუფლების ამ შეთავაზებას, მერე რას ვიღებთ შედეგად? ვიღებთ შედეგად მარტივ რამეს – საზოგადოება რჩება პარტნიორის გარეშე.

უკაცრავად, მაგრამ არც პარლამენტი, არც მთავრობა, არც სასამართლო არ არის მოქალაქის პარტნიორი. მოქალაქის პარტნიორი არის მხოლოდ მედია. ამ პარტნიორის გარეშე ტოვებს საზოგადოებას ხელისუფლება.

ასეთი საზოგადოება რჩება სუსტი, ასეთი საზოგადოების მართვა არის ძალიან მარტივი ხელისუფლებისთვის და საზოგადოება შედეგად იღებს ავტორიტარიზმს.  მერე ძალიან ძნელია ამ ავტორიტარიზმს წინააღმდეგობა გაუწიო.

უბრალოდ დავფიქრდეთ იმაზე, რამდენად პრობლემური იქნება ჩვენი ცხოვრება მედიის გარეშე. ჩვენ აქეთკენ გვიბიძგებს ხელისუფლება“ – განაცხადა ზვიად ქორიძემ.

__________________________

  • რა მოხდა? 

5 ივლისს, თბილისში, თბილისი პრაიდის კვირეულის ფარგლებში დაგეგმილი ღირსების მარშის ჩასაშლელად, ჰომოფობიური ჯგუფები საპატრიარქოს ორგანიზებით რუსთაველის გამზირზე გამოვიდნენ.

ძალადობრივი ჯგუფები რუსთაველის გამზირსა და მიმდებარე ქუჩებზე 53 ჟურნალისტს დაესხნენ თავს. რამდენიმე მათგანი ახლაც საავადმყოფოშია. აგრესიული ადამიანები თავს ესხმოდნენ და ფიზიკურად უსწორდებოდნენ ყველას, ვინც რაიმე ნიშნით – მათ შორის მიკროფონით, კამერითა თუ ფოტოაპარატით – მედიასთან ასოცირდებოდა.

აქციის დროს დაზარალდა ოპერატორი ალექსანდრე ლაშქარავა, რომელსაც აღენიშნებოდა სახის ტვინის შერყევა, სახის ძვლების მოტეხილობა და მრავლობითი დაჟეჟილობა. ლექსო ლაშქარავა საკუთარ სახლში გარდაცვლილი 11 ივლისს იპოვეს.

შინაგან საქმეთა სამინისტრომ განაცხადა, რომ გამოძიება დაიწყო და სიკვდილის მიზეზის დასადგენად ტარდება სასამართლო-სამედიცინო ექსპერტიზა.

მედიის საკითხებზე მომუშავე არასამთავრობო ორგანიზაციები, ასევე მედიასაშუალებების წარმომადგენლები, 5 ივლისის ძალადობის გამო პასუხისმგებლობას ხელისუფლებას აკისრებენ და შესაბამისად, ითხოვენ პრემიერ-მინისტრისა და შინაგან საქმეთა მინისტრის გადადგომას.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com