„ჩვენ, მასწავლებლის ეროვნული ჯილდოს ათეულთა კლუბის წევრები, შეშფოთებულები ვართ ბოლო დღეებში საქართველოს დედაქალაქში განვითარებული მოვლენებით, რაც გამოიხატა განსხვავებული აზრის დევნითა და სასტიკი ჩახშობით. განსაკუთრებით გვაშინებს ის, რომ გამოვლენილი ძალადობის აღკვეთა ვერ მოხდა ხელისუფლების მიერ.
მიგვაჩნია, რომ ადამიანთა მიერ ხელისუფლებისადმი გადაცემული ძალაუფლების გამართლება შეიძლება მხოლოდ იმ შემთხვევაში, თუკი იგი აღკვეთს ძალადობას და მოქალაქეებს დაიცავს ამისგან. ასეთი ფუნქციის შეუსრულებლობა ლეგიტიმაციის მიღმა აყენებს ნებისმიერ ხელისუფალს“, – ნათქვამია განცხადებაში, რომელიც დღეს 12 ივლისს, მასწავლებლის ეროვნული ჯილდოს ფეისბუქის გვერდზე გავრცელდა.
ამავე განცხადებაში ათეულის კლუბის წევრი პედაგოგები მოუწოდებენ ხელისუფლებას დაისაჯონ მოძალადეები და ამ ძალადობის დამკვეთი პირები.
„მოვითხოვთ, პარლამენტში შეიქმნას დროებითი საგამოძიებო კომისია, რომელიც შეისწავლის ყველა მხარის, განსაკუთრებით ხელისუფლების წარმომადგენელთა შესაძლო გადაცდომებსა თუ გულგრილობის შემთხვევებს“, – ნათქვამია განცხადებაში.
