Batumelebi | აღკვეთეთ საჯარო სივრცეში ძალადობა – ომბუდსმენი აღკვეთეთ საჯარო სივრცეში ძალადობა – ომბუდსმენი – Batumelebi
RU | GE  

აღკვეთეთ საჯარო სივრცეში ძალადობა – ომბუდსმენი

საქართველოს სახალხო დამცველი რუსთაველის გამზირზე მიმდინარე მოვლენებს ეხმიანება და განცხადებას ავრცელებს.

ომბუდსმენი უკიდურესად შემაშფოთებლად მიიჩნევს დღეს, 5 ივლისს, რუსთაველის გამზირზე და მოძრაობა „სირცხვილიას“ ოფისთან მიმდინარე ძალადობრივ მოვლენებს.

„მედიის მიერ გავრცელებულ კადრებში ნათლად ჩანს, თუ როგორ ესხმიან თავს ძალადობრივი ჯგუფები „ღირსების მარშის“ მხარდამჭერებს და ჟურნალისტებს. შექმნილი გარემო რეალურ საფრთხეს უქმნის მედიის წარმომადგენლების სიცოცხლეს და ჯანმრთელობას და იწვევს ჟურნალისტური საქმიანობის განხორციელების შეფერხებას.

პასუხისმგებლობის მშვიდობიან დემონსტრანტებზე გადატანით, ისედაც დაძაბული ფონი გაამძაფრა, ასევე, საქართველოს პრემიერ-მინისტრის ირაკლი ღარიბაშვილის განცხადებამ, რომელმაც ღირსების მარში სამოქალაქო დაპირისპირების გამომწვევ მიზეზად შეაფასა და აღნიშნა, რომ პრაიდის უკან „რევანშისტული და რადიკალური“ პოლიტიკური ძალები დგანან“ – წერია განცხადებაში.

სახალხო დამცველი კიდევ ერთხელ შეახსენებს მაღალი თანამდებობის პირებს, რომ მშვიდობიანი გამოხატვისა და შეკრების თავისუფლების დაცვა, მათ შორის, კონტრდემონსტრანტების ძალადობრივ ქმედებებზე სამართლებრივი რეაგირების გზით, სახელმწიფოს კონსტიტუციური ვალდებულებაა და მოუწოდებს სამართალდამცავ ორგანოებს, სამართლებრივი მექანიზმების გამოყენებით, სავარაუდო სამართალდამრღვევი პირები საჯარო სივრცეებს დროულად განარიდონ.

სახალხო დამცველი მოუწოდებს შინაგან საქმეთა სამინისტროს, აღკვეთოს საჯარო სივრცეში მიმდინარე ძალადობა, რაც საფრთხეს უქმნის მოქალაქეთა სიცოცხლესა და ჯანმრთელობას. ასევე, სამართლებრივი რეაგირება მოახდინონ ფიზიკური თავდასხმების და სიტყვიერი შეურაცხყოფის ფაქტებზე.

საპატრიარქოს მიერ დღეს ორგანიზებულ აქციაზე ძალადობრივმა, ჰომოფობიურმა ჯგუფებმა სიტყვიერი და ფიზიკური შეურაცხყოფა მიაყენეს ჟურნალისტებს, დააზიანეს მედიასაშუალებების ტექნიკა, დააარბიეს პარლამენტის წინ გაშლილი კარვები.

ძალადობრივი ჯგუფის წევრები დღეს „თბილისი პრაიდის“ ოფისში აივნიდან შეიჭრნენ და ოფისი დაარბიეს. „თბილისი პრაიდის“ წევრების ინფორმაციით, მოძალადეთა შეჭრის დროს ოფისში არავინ იმყოფებოდა.

მიმდინარე უკონტროლო ძალადობის ფონზე საპატრიარქო განცხადებას ავრცელებს და წერს, რომ „დღევანდელი მსვლელობა და შეკრება უნდა იყოს მხოლოდ და მხოლოდ მშვიდობიანი და ლოცვისკენ მიმართული“.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com