დღეს, 5 ივლისს, თბილისში „ღირსების მარშია“ დაგეგმილი, თუმცა ამ დრომდე რუსთაველის გამზირზე საპატრიარქოს მიერ ორგანიზებული აქციაზე ჰომოფობიური და ძალადობრივი ჯგუფის წევრები არიან, რომლებიც სიტყვიერ და ფიზიკურ შეურაცხყოფას აყენებენ ჟურნალისტებს, აზიანებენ მედიასაშუალებების ტექნიკას და არბევენ პარლამენტის წინ გაშლილ კარვებს.
ამ დრომდე [13:16] რამდენიმე პოლიტიკოსი ეხმიანება რუსთაველის გამზირზე მიმდინარე მოვლენებს.
„რატოა ასეთი უმოქმედო და უნიათო პოლიცია? დაუშვებელია ასეთი თარეში და რბევა! დაუყოვნებლივ აღსაკვეთია ძალადობა“ – წერს ფეისბუქზე ალეკო ელისაშვილი, „მოქალაქეების“ ლიდერი.
სერგი კაპანაძე, „ევროპული საქართველოს“ ყოფილი წევრი წერს, რომ თუ სახელმწიფო ძალადობას არ ალაგმავს, სახელმწიფო აღარ გვექნება.
„ხვალ ეს ტროგლოდიტები შეკრებას დაუშლიან რომელიმე პოლიტიკური პარტიის მხარდამჭერებს, ზეგ ქალებს, მაზეგ პროფკავშირებს, ერთ კვირაში უცხოელებს, მერე სტუდენტებს, მერე რელიგიურ უმცირესობებზე გაილაშქრებენ ქრისტეს სახელით, ამის მერე კიდევ სხვაზე იძალადებენ. ან სახელმწიფო ამ ძალადობას ალაგმავს (ყველამ ვიცით, რომ არ ალაგმავს), ან სახელმწიფო აღარ გვექნება. ასე მარტივად დგას საკითხი,“ – წერს სერგი კაპანაძე.
გიგი უგულავა, „ევროპული საქართველოს“ კიდევ ერი ყოფილი ლიდერი კი მიიჩნევს, რომ ღარიბაშვილმა „ხელები დაიბანა“:
„ღარიბაშვილმა პილატეს მსგავსად ხელები დაიბანა.
პატრიარქმა და მისმა სინედრიონმა რუსთაველი გოლგოთას დაამსგავსეს. დიახ, ყოველი ჩაგრული დღეს იესოა და მთავარი მჩაგვრელი იესოს სახელით მქადაგებელი პატრიარქი, კაიაფა და მისი სინედრიონია. საკუთარი ცოდვის მონანიების ნაცვლად მისი გადაფარვა გადაწყვიტეს. მთელი საპატრიარქო ერთმანეთს უბეში უძვრებით, მხოლოდ იმაზე ჭორაობთ, ვინ ვისთან წევს და ასე უსინდისოდ აგიჟებთ ამ ხალხს. პირდაპირ რუსეთის მეხუთე კოლონა ხართ.
გრცხვენოდეთ, თქვენო უწმინდესობავ. თქვენ იქ იესო არ დაგხვდებათ. თქვენ იქ მხოლოდ სტალინს იხილავთ. ამ ცოდვას თქვენ ღმერთი და შთამომავლობა არასდროს გაპატიებთ.
ზოგჯერ მთხვევის ნაცვლად სახარებასაც თუ წაიკითხავთ მიხვდებით: “რომელმან აღიღოს მახვილი, მახვილითვე წარწყმდეს” “არა არს დაფარულ რომელი არა განცხადდეს” – წერს გიგი უგულავა ფეისბუქზე.
ჰომოფობიური, ძალადობრივი ჯგუფის წევრები დღეს „თბილისი პრაიდის“ ოფისში აივნიდან შეიჭრნენ და ოფისი დაარბიეს. „თბილისი პრაიდოს“ წევრების ინფორმაციით, მოძალადეთა შეჭრის დროს ოფისში არავინ იმყოფებოდა.
მანამდე საპატრიარქოს მიერ ორგანიზებულმა ძალადობრივი ჯგუფის წარმომადგენლებმა დაარბიეს „სირცხვილიას“ ოფისიც.
მიმდინარე უკონტროლო ძალადობის ფონზე საპატრიარქო განცხადებას ავრცელებს და წერს, რომ „დღევანდელი მსვლელობა და შეკრება უნდა იყოს მხოლოდ და მხოლოდ მშვიდობიანი და ლოცვისკენ მიმართული“.
