როგორ ხდება წონის კლება კუჭის ბოტოქსის საშუალებით | ექიმის რჩევები

• ქალბატონო თამარ, რა პრინციპით მუშაობს ეს პროცედურა?

კუჭის ბოტოქსი ჭარბ წონასთან ბრძოლის ახალი მეთოდია, რომელიც გამოიყენება წონაში ზომიერად, სწრაფად და უსაფრთხოდ კლებისთვის. ეს მეთოდი მარტივი და გართულებების მინიმუმამდე დაყვანილი თვისებებით გამოირჩევა. კვლევებმა აჩვენა მისი ეფექტურობა, რაც მინიმალურ დროში შესამჩნევი შედეგით განისაზღვრება.

რაც შეეხება თვითონ პროცედურას: ექიმ-ენდოსკოპისტს, გასტროსკოპიის დახმარებით შეჰყავს შესაბამისი ნივთიერება – ბოტოქსი კუჭის კუნთში, რაც იწვევს კუჭის პარეზს ანუ მოძრაობითი ფუნქციის შესუსტებას. ეფექტი გამოიხატება შიმშილის რეცეპტორების დათრგუნვით, რის გამოც საკვების გადადინებას კუჭიდან ნაწლავებში სჭირდება 10-დან 12 საათი, რაც წონაში კლების ერთ-ერთი მნიშვნელოვანი მექანიზმია [ჩვეულებრივ, 6-დან 8 საათამდეა საჭირო იმისთვის, რომ საკვები კუჭის გავლით წვრილ და შემდეგ მსხვილ ნაწლავამდე მივიდეს]. შესაბამისად, პაციენტი ვერ იკვებება იმ რაოდენობის ულუფით, რასაც იღებდა პროცედურამდე.

• პროცედურა ნარკოზის საშუალებით კეთდება?

აღნიშნული მანიპულაცია ინტრავენური საანესთეზიო საშუალების დახმარებით კეთდება.

• რა ხანგრძლივობისაა პროცედურა და რამდენ ხანში მიდის პაციენტი სახლში?

პროცესის ხანგრძლივობა 15-20 წუთია, პაციენტს ჰოსპიტალიზაცია არ სჭირდება და ის რამდენიმე საათში ეწერება ბინაზე. 

• რა არის კუჭის ბოტოქსის ინექციების ჩვენება, ვისთვის შეიძლება და ვისთვის – არ?

კუჭის ბოტოქსის ინექციის ჩვენებას წარმოადგენს სიმსუქნე იმ პაციენტებში, რომლებსაც აღენიშნებათ მთელი რიგი ცვლილებები ორგანიზმში ჭარბწონიანობის გამო, სჭირდებათ წონაში კლება, მაგრამ ვერ აგვარებენ პრობლემას, რადგან უჭირთ კვების შემცირება. პროცედურის შემდეგ მათ არ შეუძლიათ მიიღონ დიდი რაოდენობით საკვები.

თვითონ მანიპულაციას გააჩნია თავისი ჩვენებები და უკუჩვენებები.

რაც შეეხება ჩვენებებს, პროცედურის ჩატარება შესაძლებელია 16-დან 65 წლის ჩათვლით პაციენტებისთვის, ვისი სხეულის მასის ინდექსი – BMI არის 28-40.

ეს არ არის ქირურგიული ჩარევა, ოპერაციის შემდგომ პაციენტს არ სჭირდება მუდმივად მედიკამენტების მიღება.

პროცედურის უკუჩვენებებია: სისხლდენა, ალერგია ბოტოქსზე, ყაბზობა, ნაღველკენჭოვანი დაავადებები, კუჭის წყლული, გასტრიტი, თორმეტგოჯა ნაწლავის წყლული, გარკვეული ტიპის ენდოკრინული დაავადებები, სიმსივნე და 40-ზე მაღალი BMI.

• დაახლოებით რამდენ ხანში დგება შედეგი?

კლინიკური ეფექტი ვლინდება პროცედურიდან 24-72 საათში და გრძელდება 4- 6 თვის განმავლობაში. რაც შეეხება განმეორებით ბოტოქსის ინექციას, შეიძლება გაკეთდეს სამჯერ ექვსთვიანი ინტერვალით. 

ჭარბი წონის მკურნალობის პროცესში მას არ ახლავს სერიოზული გვერდითი მოვლენები. მსოფლიო მასშტაბით დღემდე არ დაფიქსირებულა კუჭში ბოტოქსის ინექციის შემდგომი რაიმე სერიოზული გართულება, ვინაიდან ეს პროცედურა ტარდება ენდოსკოპიურად.

იშვიათი გართულებებია: გულისრევა, ღებინება და დისკომფორტი ეპიგასტრიუმის მიდამოში.

• როგორია რეკომენდაციები პროცედურის შემდეგ, რაიმე შეზღუდვები თუ არის აქტივობის ან კვების მხრივ?

პროცედურის შემდგომ მნიშვნელოვანია სწორი დიეტა, ამიტომ პაციენტისთვის ენდოკრინოლოგთან ერთად იქმნება მასზე ინდივიდუალურად მორგებული კვების რეჟიმი, თუმცა მინიმალური შეზღუდვებით.