„ზეთი დაახლოებით ერთი ლარით გაიაფდა,“ – გვითხრეს დღეს, 8 ივნისს, ბათუმის აგრარულ ბაზარში ზეთით მოვაჭრეებმა. აქ ვეცადეთ იმის გარკვევა, თუ როგორ აისახა საკვები პროდუქტების, მათ შორის, იმპორტირებული პროდუქციის ფასზე ლარის კურსის გამყარება. 8 ივნისის მდგომარეობით ლარის გაცვლითი კურსი აშშ დოლართან არის 3.18, აპრილში ლარის გაუფასურების მაჩვენებელი კი 3.45-მდე იყო.
„მაგალითად, ეს ხუთლიტრიანი ბოთლით ზეთი 32 ლარი ღირდა აქამდე და ლარ-ნახევარი დააკლდა, უფრო დაბალფასიან ზეთს დააკლდა ფასი. ის, რაც 47 და 48 ლარი გახდა, ახლაც იგივე ფასია, დაახლოებით 10 დღეა, რაც შეიცვალა ფასები და აისახა ლარის გამყარება,“ – უთხრა „ბათუმელებს“ თამაზ სირაბიძემ.
იმპორტირებული პროდუქტებიდან გაიაფდა შაქარიც. მოვაჭრეების თქმით, ერთი ტომარა შაქარი ლარის გაუფასურების დროს 104 ლარი ღირდა, ბოლო დღეებში კი დაახლოებით 5 ლარით გაიაფდა.
„შაქარს კილოს უკვე ვყიდდით 2 ლარად 20 თეთრად, ახლა ისევ ორ ლარში ვყიდით… მეტი არაფერი არ გაიაფებულა, რაღაც თეთრები თუ დააკლდა, ისაა,“ – დასძინა თამაზ სირაბიძემ.
ბათუმის აგრარულ ბაზარში გვითხრეს, რომ გაიაფდა ქათამიც.
„ქათამი იმპორტირებული არ არის, მაგრამ გაიფდა ის საკვები, რომელიც სხვა ქვეყნებიდან შემოაქვთ ქათმების გამოსაკვებად,“ – ამბობს იამზე აბჟანდაძე. დღევანდელი მონაცემებით, კილოგრამი ქათმის ფასი დაახლოებით 7 ლარია.
„აქამდე 8 ლარი იყო, რვა-ნახევარიც,“ – დასძინა ქათმებით მოვაჭრემ.
„ოდნავ მომატებულია ყველის ფასი,“ – გვითხრეს ყველით მოვაჭრეებმა. იმერული ყველი აგრარულ ბაზარში 9 – 10 ლარი ღირს, სულგუნი – 13-14 ლარი, შებოლილი სულგუნი – 16-17 ლარი.
ბათუმის აგრარული ბაზარი, 8 ივნისი, 2021 წელი
