ბათუმის ბულვარის დირექტორმა არჩილ კახიძემ გადადგომის შესახებ განცხადება დაწერა. რაც შეეხება მის მოადგილეებს, როგორც მან „ბათუმელებს“ განუცხადა, შინაგანაწესით, როცა დირექტორი ტოვებს თანამდებობას, ავტომატურად თავისუფლდებიან მოადგილეებიც.
აჭარის მთავრობას განცხადება ბულვარის დირექტორის გადადგომის შესახებ ჯერჯერობით არ დაუკმაყოფილებია.
ბათუმის მერიისთვის ბულვარის დაბრუნების საკითხი აჭარის მთავრობამ 2 თებერვალს გამართულ სხდომაზე გადაწყვიტა. ბულვარი მერიას გადაეცემა თავისი ბიუჯეტით, რომელიც აჭარის მთავრობამ მისთვის წლის დასაწყისში გამოყო.
სხდომაზე ითქვა, რომ მთავრობამ ეს გადაწყვეტილება საზოგადოების დაკვეთით მიიღო, მას შემდეგ რაც ბათუმში, ძველ ბულვარში მთავრობის კონცეფცია გააპროტესტეს, რომელიც ბულვარში ალეის გაუქმებას ითვალისწინებდა.
აჭარის ფინანსთა და ეკონომიკის მინისტრმა დავით ბალაძემ განაცხადა, რომ კვირის ბოლომდე გაათავისუფლებდა ბულვარის ადმინისტრაციის ხელმძღვანელსა და მის მოადგილეებს თანამდებობებიდან, რის შემდეგაც ბათუმის მერიას, ბათუმის საკრებულოსთან შეთანხმებით, შეეძლება დანიშნოს ახალი ხელმძღვანელები.
3 თებერვალს საგანგებო განცხადება გაავრცელა საინიციატივო ჯგუფმა – „დაიცავი ძველი ბულვარი”. „აღვნიშნავთ, რომ სსიპ „ბათუმის ბულვარის“ თანამშრომლების განთავისუფლება არ არის არც საინიციატივო ჯგუფის და არც საზოგადოების მოთხოვნა. ჩვენი მიზანია ბათუმის ბულვარის, როგორც ისტორიული ბაღის დაცვა და შენარჩუნება,“ – აღნიშნულია განცხადებაში.
