„აჭარაში კანიონინგის განვითარებასა და მასთან დაკავშირებული სერვისების შექმნა-გამართვის მიზნით“, ტურისტული პროდუქტების განვითარების სააგენტო კანიონინგის სპეციალურ აღჭურვილობას ყიდულობს.
„სოფელ უჩხოში [ხულოს მუნიციპალიტეტი] არსებულ კასკადოვან ჩანჩქერებს გააჩნია კანიონინგის პოტენციალი. კანიონინგი სათავგადასავლო ტურიზმის ერთ-ერთი საინტერესო მიმართულებაა და მსგავსი ტურისტული პროდუქტის შექმნა ხეობაში ტურიზმის დარგის განვითარებას და ტურისტების მოზიდვას შეუწყობს ხელს, რაც თავისთავად დადებითად აისახება ადგილობრივების ეკონომიურ კეთილდღეობაზე“ – აღნიშნულია სააგენტოს სატენდერო განაცხადში.
ტენდერის მიხედვით სააგენტო სხვადასხვა რაოდენობის სპეციალურ აღჭურვილობას შეიძენს, როგორც სტუმრებისთვის, ასევე კანიონერი გიდისთვის [კანიონინგის ქურთუკი, შარვალი, წინდები, ჩაფხუტი; კანიონინგის დაცვის ქამარი, დასაშვები „რვიანი“, კანიონინგის ორმაგი ღვედი, კარაბინები. ასევე, წყლის სათვალე, პროგრესის შემაჩერებელი გორგოლაჭი, დასაშვები მოწყობილობა, დამხმარე თოკი და სხვა].
წინადადებების მიღება 2021 წლის 31 მაისს დაიწყება და 2 ივნისს დასრულდება, სპეცაღჭურვილობა კი ტენდერში გამარჯვებულმა სააგენტოს ხელშეკრულების გაფორმებიდან 30 დღეში უნდა მიაწოდოს.
ამავე თემაზე:
აჭარაში კასკადოვან ჩანჩქერებზე თოკით დაშვება იქნება შესაძლებელი [ფოტო]