კონკურსი მშენებლებისთვის – მთავრობა დევნილებს ბინებს უყიდის

დევნილთა, ეკომიგრანტთა და საარსებო წყაროებით უზრუნველყოფის სააგენტოს ინფორმაციით, გამოცხადებულია კონკურსი მენაშენეებისგან ბინების შესყიდვაზე – იძულებით გადაადგილებულ პირთა, დევნილთა გრძელვადიანი საცხოვრებლით უზრუნველსაყოფად.

სააგენტოს განცხადებით, საკონკურსო წინადადებაში წარმოდგენილი საცხოვრებელი ფართობები განთავსებული უნდა იყოს თბილისში, ქუთაისში და ბათუმში. ოღონდ, ბათუმში ამ კონკურსის ფარგლებში, მხოლოდ 2 ბინას შეიძენენ – სააგენტოს აქვს ვალდებულება, ორ კონკრეტულ დევნილ ოჯახს გადასცეს ბინა.

„ბათუმელების“ ინფორმაციით, ეს ვალდებულება სააგენტოს სასამართლომ დააკისრა.

სააგენტოს განცხადებით, 1 კვ.მ-ის მაქსიმალური ფასი ქალაქების მიხედვით უნდა იყოს:

• ბათუმსა და ქუთაისში – მაქსიმუმ 470 აშშ დოლარის ექვივალენტი ლარში;
• თბილისში – მაქსიმუმ 550 დოლარის ექვივალენტი ლარში

ექვივალენტი გამოითვლება ხელშეკრულების გაფორმების დროისათვის არსებული კურსით. ბინების შეთავაზებისას ქუთაისსა და თბილისში მდებარე ბინებზე რაიმე შეზღუდვა რაოდენობრივად არ არის.

„კომისია გადაწყვეტილების მიღებისთვის არსებით პირობად მიიჩნევს საკონკურსო წინადადების დაბალ ფასს, უძრავი ქონების მიწოდების ვადას, სამუშაო გამოცდილებას, სააგენტოსთან არსებული სამართალურთიერთობის ფარგლებში ნაკისრი ვალდებულებების დროულ შესრულებას, მისაწოდებელი უძრავი ქონების მოცულობას და/ან მეწარმის კეთილსინდისიერებას.

„შემოთავაზებული საკონკურსო წინადადება, გარდა ქ. ბათუმში განთავსებული საცხოვრებელი ფართებისა, შესაძლებელია შეიცავდეს ერთოთახიან, ოროთახიან, სამოთახიან და ოთხოთახიან საცხოვრებელ ფართ(ებ)ს, რომელთა კვადრატულობებია: ერთოთახიანი – 30-40 კვ/მ, ოროთახიანი – 50- 60 კვ/მ, სამოთახიანი – 70-80 კვ/მ და ოთხოთახიანი – 90- 100 კვ/მ.

ქ. ბათუმში განთავსებული საკონკურსო წინადადებ(ები)ა უნდა შეიცავდეს მხოლოდ 2 ერთოთახიან საცხოვრებელ ფართობს, რომელთა კვადრატულობაა 30- 40 კვ/მ“, – აღნიშნულია საკონკურსო განაცხადში.

საცხოვრებელი ბინების მიწოდების საორიენტაციო ვადა, ხელშეკრულების გაფორმებიდან 24 თვეა [„მოწოდების ვადაში მენაშენემ უნდა განახორციელოს, ტექნიკური პირობების შესაბამისად, უძრავი ქონების დასრულება, ექსპლუატაციაში მიღება, და სხვა პროცედურები, შესაბამისი უძრავი ქონების სახელმწიფო საკუთრებაში რეგისტრაციის მიზნით.“]

საკონკურსო წინადადებები კონკურსში მონაწილეობის მსურველებმა „დევნილთა, ეკომიგრანტთა და საარსებო წყაროებით უზრუნველყოფის სააგენტოში“ ან სააგენტოს ტერიტორიულ სამმართველოებში დალუქული კონვერტით უნდა წარადგინონ.