დღეს, 2 მაისს, ინდოეთში კორონავირუსით გარდაცვლილთა ამ დრომდე რეკორდული რაოდენობა – 3 689 დაფიქსირდა. გუშინ ინდოეთში კორონავირუსის ახალი შემთხვევების რაოდენობამ ერთ დღეში 400 000-ს გადააჭარბა. შესაბამისად, ინდოეთი პირველ ადგილზეა ერთ დღეში ინფიცირებულთა რაოდენობით.
BBC-ის ცნობით, ამის შესახებ ინდოეთის ჯანდაცვის მინისტრმა დღეს დილით, კრიზისის განხილვისას განაცხადა.
ინდოეთში საავადმყოფოები და სამედიცინო დაწესებულებები საწოლებისა და სამედიცინო ჟანგბადის უკმარისობის გამო ვერ ახერხებენ პაციენტების სრულად მიღებას და მკურნალობას.
ბოლო ათი დღის განმავლობაში ოჯახები ცდილობენ საავადმყოფოებში საწოლებისა და სიცოცხლისათვის აუცილებელი ინვენტარის მოძიებას, პარალელურად კი კრემატორიუმები და მორგები გადატვირთულია ცხედრებით.
შაბათს, დელის ერთ-ერთი ჰოსპიტალში 12 ადამიანი დაიღუპა მას შემდეგ, რაც ჰოსპიტალს ჟანგბადი დაუმთავრდა.
„ინდოეთის თაიმსის“ ცნობით, ანდრა პრადეშის სამხრეთ შტატის ორ ჰოსპიტალში ჟანგბადის უკმარისობის გამო 16, ხოლო დელის გარეუბანში 6 ადამიანი გარდაიცვალა.
დელის უმაღლესი სასამართლოს გადაწყვეტილებით, დაიწყება ოფიციალური პირების დასჯა, თუ კი სიცოცხლისათვის აუცილებელი მარაგები ჰოსპიტლებამდე ვერ მიაღწევს.
ექსპერტები აცხადებენ, რომ კორონავირუსით გარდაცვლილთა ოფიციალური რიცხვი ინდოეთში რეალურზე ბევრად დაბალია. ისინი ხაზს უსვამენ ტესტირების დაბალ მაჩვენებელს და სახლებში გარდაცვლილ ადამიანებს, რომელთა რაოდენობა განსაკუთრებით მაღალია სოფლებსა და გარეუბნებში.
კრიზისის ფონზე, მარტსა და აპრილში, ქვეყნის 5 შტატში გამართული არჩევნების შედეგების დათვლა დღეს დაიწყო.
დღეის მდგომარეობით, ინდოეთში თითქმის 20 მილიონი ადამიანია კორონავირუსით ინფიცირებული. გარდაიცვალა 215 542 ადამიანი. ინდოეთი ამ მონაცემებით მხოლოდ ამერიკის შეერთებულ შტატებს ჩამორჩება.
___
ფოტო: Chethan Cheenu
