შესწორება: მასალაში თავდაპირველად აღნიშნული იყო, რომ იკეტება თურქეთის საზღვრები, თუმცა საუბარია არა საზღვრების დაკეტვაზე, არამედ ლოქდაუნზე ქვეყნის საზღვრებში. ჯერჯერობით არ არის დაზუსტებული ინფორმაცია ქვეყნის საზღვრების ჩაკეტვის შესახებ.
თურქული მედიის ინფორმაციით, კორონავირუსის პანდემიიდან გამომდინარე, თურქეთში სრული ლოქდაუნი ცხადდება – ქვეყანა 18 დღით იკეტება.
ინფორმაცია ამის შესახებ, მთავრობის სხდომის დასრულების შემდეგ, თავად პრეზიდენტმა რეჯეფ თაიფ ერდოღანმა გააცნო მედიას.
პრეზიდენტ ერდოღანის თქმით, კორონავირუსის პანდემიიდან გამომდინარე, ეპიდემიის დაძლევის მიზნით, თურქეთის სახელმწიფომ გადაწყვიტა, რომ 2021 წლის 29 აპრილის 19:00 საათიდან 2021 წლის 17 მაისამდე მთელს ქვეყანაში სრული ლოქდაუნი გამოაცხადოს.
თურქეთმა 22 აპრილს 19:00 საათიდან კორონავირუსის გავრცელების პრევენციის ფარგლებში, მოქალაქეებს ქუჩაში გასვლა აუკრძალა. ამ აკრძალვის ვადა დღეს, 26 აპრილს ამოიწურა.
