Batumelebi | როგორ აანაზღაურებენ მასწავლებლები 4-11 მაისის უქმე დღეებს როგორ აანაზღაურებენ მასწავლებლები 4-11 მაისის უქმე დღეებს – Batumelebi
RU | GE  

როგორ აანაზღაურებენ მასწავლებლები 4-11 მაისის უქმე დღეებს

განათლების სამინისტროს ინფორმაციით, სკოლებმა 4-11 მაისის ჩათვლით გამოცხადებული უქმე დღეების ანაზღაურება ინდივიდუალურად დაგეგმილი სასწავლო პროცესით უნდა შეძლონ.

„იმისთვის, რომ სასწავლო დღეების შემცირება უარყოფითად არ აისახოს მოსწავლეთა შედეგებზე და სკოლებმა ეროვნული სასწავლო გეგმით დადგენილი მოთხოვნების შესრულება შეძლონ, განათლებისა სამინისტრომ სკოლებისთვის რეკომენდაციები შეიმუშავა, რაც სასწავლო პროგრამის მოდიფიცირებას გულისხმობს“, – ამბობს სამინისტრო.

სამინისტროს ინფორმაციით, სკოლებს უკვე გაეგზავნა დეტალური რეკომენდაციების პაკეტი. „[ამის] გათვალისწინებით, სკოლა ინდივიდუალურად დაგეგმავს მისთვის მოქნილ სასწავლო პროცესს“, – აცხადებს სამინისტრო.

სამინისტროს რეკომენდაციების პაკეტის განმარტება ვთხოვეთ ბათუმის რესურსცენტრის ხელმძღვანელს, გოჩა დავითაძეს. მისი თქმით, რეკომენდაცია გულისხმობს სასწავლო პროგრამის ისე გადანაწილებას, რომ პროგრამა არ ჩავარდეს და მოსწავლეებმა პროგრამის ათვისება შეძლონ.

„მასწავლებელმა თვითონ უნდა გადაანაწილოს თავის საგანში პროგრამა ისე, რომ საკითხები არ ჩავარდეს უქმე დღეების გამო.

საუბარია კომპლექსური დავალებების შედგენაზე, რომელიც რამდენიმე თემას შეიძლება მოიცავდეს, რომელიც დაჩქარებულად შეუძლიათ გაიარონ.

ამ საკითხებზე შეადგენს მასწავლებელი კომპლექსურ დავალებებს და მოსწავლეებს შეუძლიათ დამოუკიდებლად იმუშაონ, შემდეგ კი მასწავლებლისგან მიიღებენ უკუკავშირს“, – ამბობს გოჩა დავითაძე.

მისი თქმით, სკოლებში სასწავლო პროცესი 29 აპრილს შეწყდება და 13 მაისის ჩათვლით სკოლები არც ონლაინში იმუშავებენ და არც შაბათ-კვირას მოუწევთ პროგრამის ანაზღაურება.

____________________

მთავარი ფოტო: „ბათუმელების“ არქივი

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com