თურქეთში კორონავირუსის ახალი შემთხვევების რაოდენობა ისევ იზრდება.
15 აპრილს ქვეყანაში კოვიდის 61 400 ახალი შემთხვევა გამოვლინდა.
კორონავირუსის პანდემიის დაწყებიდან დღემდე თურქეთში 4 მილიონზე მეტი ადამიანი ინფიცირდა ვირუსით, 35 031 პაციენტი გარდაიცვალა.
კორონავირუსზე ვაქცინაცია ჩინური „სინოვაკით“ თურქეთში 2021 წლის 14 იანვარს დაიწყო. თურქული მედიის ცნობით, ამ დროისათვის 11,6 მილიონზე მეტმა ადამიანმა მიიღო ვაქცინის პირველი, ხოლო 7,72 მილიონმა – ვაქცინის ორივე დოზა.
კოვიდის ახალი შემთხვევების ზრდის გამო თურქეთში 14 აპრილიდან ამოქმედდა შეზღუდვა გადაადგილებასთან დაკავშირებით. კერძოდ, მოქალაქეებს ქუჩაში გასვლა ეკრძალებათ კვირის სამუშაო დღეებში საღამოს 7-დან დილის 5 საათამდე.
ასევე, ძალაში რჩება შაბათ-კვირას ქუჩაში გასვლის შეზღუდვა, რომელიც თურქეთში 30 მარტს ამოქმედდა დიდ ქალაქებში.
გარდა ამისა, სამუშაო დღეებში საღამოს 7 საათიდან დილის 5 საათამდე და შაბათ-კვირას, გადაუდებელი შემთხვევების გარდა, მოქალაქეებს ეკრძალებათ საქალაქთაშორისო მიმოსვლა.
_____________
ფოტო: „ანადოლუ“/aa.com.tr
