ხერხემლის დაზიანების დროული გამოვლენა ძალიან მნიშვნელოვანია ნებისმიერი ადამიანისთვის, რადგან მას არაერთი სერიოზული პრობლემის გამოწვევა შეუძლია ორგანიზმში. ასევე საყურადღებოა სასკოლო ასაკის ბავშვებში სქოლიოზის გამოვლენა და მისი მართვა.
ორთოპედ-ტრავმატოლოგი, ექიმი მიხეილ მიქელაძე სქოლიოზის დროულად გამოვლენის მნიშვნელობაზე საუბრობს.
რა არის სქოლიოზი?
სქოლიოზი არის ხერხემლის სამგანზომილებიანი დეფორმაცია, მალების როტაციით (შემობრუნებით), რომლის დამახასიათებელი ნიშანია ბავშვის ასაკთან და ზრდასთან დაკავშირებული დეფორმაციის პროგრესირება (გაუარესება).
სქოლიოზი ერთ-ერთი ყველაზე გავრცელებული დაავადებაა ტანდეგობის დარღვევის სხვადასხვა ფორმას შორის. ხშირად სქოლიოზი ნელა და შეუმჩნევლად მიმდინარეობს, რის გამოც, რიგ შემთხვევებში, მისი გამოვლენა გვიან ხდება.
როდის უნდა მივმართოთ ექიმს?
სქოლიოზის პროფილაქტიკისთვის და/ან პროგრესირების თავიდან აცილების მიზნით მნიშვნელოვანია საყრდენ-მამოძრავებელი სისტემის განვითარების რეგულარული მონიტორინგი.
რეკომენდებულია ორთოპედის კონსულტაცია წინასასკოლო პერიოდში, რათა საჭიროების შემთხვევაში, გათვალისწილებულ იქნას ექიმის რეკომენდაციები (სასკოლო ინვენტართან ადაპტირება, ჯდომის მანერა, ჩანთის ტარება და ა.შ), რომლებიც ხელს შეუშლის დაავადების პროგრესირებას (გაუარესებას).
როგორ მკურნალობენ სქოლიოზს განვითარების სხვადასხვა ეტაპზე?
სქოლიოზის მკურნალობის მეთოდები იყოფა კონსერვატიულად და ოპერაციულად. მკურნალობის ტაქტიკის შერჩევისას გათვალისწინებული უნდა იქნას სქოლიოზის ტიპი, დეფორმაციის ხარისხი, თანმხლები პათოლოგიები და ა.შ.
რა უნდა გაითვალისწინოთ?
განვითარების საწყისი ეტაპი სიმპტომების გარეშე მიმდინარეობს, დეფორმაციის ხარისხი მცირეა, მხოლოდ კვალიფიცირებულ სპეციალისტს შეუძლია შეამჩნიოს პათოლოგია, ხოლო დაავადების დროული დიაგნოსტირება და სწორად შერჩეული კონსერვატიული მკურნალობა წარმატების საწინდარია.
