Batumelebi | ახალი სამშენებლო პროექტები ძველ ბათუმში [ფოტო] ახალი სამშენებლო პროექტები ძველ ბათუმში [ფოტო] – Batumelebi
RU | GE  

ახალი სამშენებლო პროექტები ძველ ბათუმში [ფოტო]

ძველ ბათუმში, მაზნიაშვილის ქუჩაზე #21-23-ში, ერთი ისტორიული ბელეტაჟისა და ერთი სამსართულიანი სახლის ნგრევის ხარჯზე ხუთსართულიანი [ერთი მანსარდი], მრავალბინიანი სახლის მშენებლობას გეგმავენ. შესაბამისი პროექტით აჭარის კულტურული მემკვიდრეობის სააგენტოს მიმართეს. სამშენებლო ტერიტორია 280 კვ.მეტრია და ძეგლის დაცვის ზონაშია.

მაზნიაშვილის #21

პროექტი ითვალისწინებს, ასევე მაზნიაშვილის #23-ში მდებარე სამსართულიანი სახლის და ამ სახლებს შორის მცირე ეზოს ათვისებას.

მაზნიაშვილის ქუჩა #23

კულტურული მემკვიდრეობის ზონალურმა საბჭომ ეს პროექტი დაამტკიცა და განმცხადებელს მოსთხოვა, პროექტის შეთანხმების მეორე ეტაპზე უფრო დახვეწილი არქიტექტურა წარადგინოს.

რა არის და რა იქნება- რენდერი

საბჭოს წევრების უმრავლესობამ პროექტის პირველი ეტაპის შეთანხმებას მხარი დაუჭირა. ასევე მიუთითეს, რომ პროექტის არქიტექტურა დასახვეწია, ხოლო მისი მასშტაბები უნდა შემცირდეს ძეგლის ინტერესებიდან გამომდინარე. ჩაწერეს ისიც, რომ გასათვალისწინებელია პარკირების საკითხი. როგორც ჩანს, ეს პროექტით არ იყო გათვალისწინებული. ოქმში არსად ჩანს, განიხილა თუ არა საბჭომ, რამდენად მიზანშეწონილია ისტორიულ ზონაში ისტორიული სახლის დანგრევა.

საბჭოს ერთ წევრს, ოლეგ ბოლქვაძეს მითითებული აქვს, რომ პროექტს სასამართლოს გადაწყვეტილებით ითანხმებს.

რა არის და რა იქნება – რენდერი

არსებული ისტორიული ბელეტაჟის ათვისების ხარჯზე მშენებლობას გეგმავენ მაზნიაშვილისა და მელაშვილის ქუჩების კვეთაზეც [#7-19]. მესაკუთრეები აჭარის კულტურული მემკვიდრეობის სააგენტოს წერენ, რომ შენობას არ აქვს კულტურული ღირებულება და ამ ადგილზე სამსართულიანი შენობის მშენებლობის ნებართვას ითხოვენ.

ამ ადგილზე 3-სართულიანი შენობის მშენებლობის ნებართვას ითხოვენ [მაზნიაშვილი-მელაშვილის ქუჩების კვეთა]

სააგენტოს ზონალურმა საბჭომ  პროექტი შეითანხმა იმ პირობით, რომ შეთანხმების მეორე ეტაპზე განმცხადებელი უფრო დახვეწილ არქიტექტურას წარადგენს.

მაზნიაშვილისა და მელაშვილის ქუჩების კვეთაში დაგეგმილი პროექტი

სააგენტომ ახალი პროექტი შეითანხმა ასევე კომახიძის #15-ში, აქ ახალი სამსართულიანი სახლის მშენებლობის ნებართვას ითხოვენ.

______

 

ამ თემაზე:

რა დაემართა ბათუმის დამცავ ზონებს? – პასუხი არ არის

ნეტგაზეთის მასალების სხვა გამოცემებში გადაბეჭდვის წესი
ავტორი