„დაუნის სინდრომის მქონე ბავშვს აქვს გარკვეულ მიმართულებებში განსაკუთრებული ნიჭი, – უყვარს ხატვა, სიმღერა, ცეკვა და ა.შ. რომლის აღმოჩენასაც სჭირდება საკმაოდ დიდი რესურსი. სწორედ ამიტომ გადავწყვიტე მიმეყვანა სტუდიაში, სადაც ხატვის და ძერწვის გარდა იქნებოდა ბავშვებთან კომუნიკაციაში და საზოგადოებასთან ახლოს. ბევრი ძიებისა და სპეციალისტების რეკომენდაციით გადავწყვიტე მისი მიყვანა ართ თაიმ სტუდიოში, მოლოდინით, რომ ჩემი შვილი იქ უბრალოდ ბედნიერი იქნებოდა, რაც კიდევ უფრო შეუწყობდა განვითარებაში ხელს“, – წერს ბავშვის მშობელი სოციალურ ქსელში.
ბათუმში მცხოვრებმა ანა მახარაძემ, ამავე ქალაქში მდებარე სტუდიაში შვილი გასულ შაბათს მიიყვანა და მის შესახებ მასწავლებლებისთვის არაფერი დაუმალავს. მშობლის თქმით, ნიკოლოზი სტუდიაში სიხარულით მიიღეს. სტუდიიდან ნიკოლოზიც გახარებული და კმაყოფილი დაბრუნდა, მეორე დღეს კი ანა მახარაძეს დაურეკეს და სთხოვეს სტუდიიდან ბავშვის გაყვანა.
„მითხრეს, რომ ბავშვს თითქოს აქვს ქცევითი აშლილობა, ვნებს საკუთარ თავს და ხელს უშლის სხვა ბავშვებს შემოქმედებით საქმიანობაში. გადამახდევინეს ორი დღის საფასური და ბავშვთან ერთად დამტოვეს დახურული კარის მიღმა,“ – ამბობს ნიკოლოზის დედა.
არტ თაიმ სტუდიის წარმომადგენელი ადასტურებს, რომ ნიკოლოზი მიიღეს სტუდიაში, მაგრამ მშობელი გააფრთხილეს წინასწარ, რომ სტუდიაში ხატვის კურსს ასწავლიდნენ ახალგაზრდა მხატვრები, რომელთაც არ ჰქონდათ სპეცმასწავლებლის კვალიფიკაცია, თუმცა დათანხმდნენ ხატვის გაკვეთილებზე ბავშვის საცდელი დროით მიღებას.
„ძალიან რთულია წინასწარ თქვა შეეგუება თუ არა დაუნის სინდრომის მქონე ბავშვი ხატვის გაკვეთილს, წებო, მაკრატელი, საღებავები – ისეთი მასალები და საგნებია, რასაც ხანდახან ბავშვი არამიზანმიმართულად იყენებს. რთულია ასეთ დროს არასპეციალისტმა მასწავლებელმა მართოს ასეთი ქცევა. მშობელს ვუთხარით წინასწარ, რომ საცდელი დროით შეგვეძლო ბავშვის ხატვის წრეზე მიღება და მალევე გამოვლინდა, რომ ჩვენ ამას ვერ შევძლებდით. ვწუხვართ, რომ ასე მოხდა, მაგრამ არაკეთილსინდისიერება იქნებოდა აგვეღო საკუთარ თავზე იმის პასუხისმგებლობა, რასაც რეალურად ვერ შევძლებდით“, – ამბობს საგანმანათლებლო შემოქმედებითი სტუდია ,,არტ-თაიმის“ წარმომადგენელი ნინო ბიაძე.
___
ამავე თემაზე:
