მთავარი,სიახლეები

კობახიძე: „ჩემი პატივისცემა ღირსეულ პრემიერს და ღირსეული ოჯახის ღირსეულ შვილს, ბერას“

07.03.2021 • 1478
კობახიძე: „ჩემი პატივისცემა ღირსეულ პრემიერს და ღირსეული ოჯახის ღირსეულ შვილს, ბერას“

„ქართული ოცნების“ თავმჯდომარე, ირაკლი კობახიძე ფეისბუქის პირად გვერდზე ეხმაურება “ტვ პირველის” მიერ გავრცელებულ ფარულ აუდიოჩანაწერებს, სადაც, შესაძლოა, ირაკლი ღარიბაშვილი, ანზორ ჩუბინიძე და ბერა ივანიშვილი მონაწილეობენ.

„აშკარაა, რომ ნაციონალური მოძრაობა ვერ იშლის თავისას. უკანონო მოსმენა, ჩანაწერების ფაბრიკაცია, მორალური და ფიზიკური ძალადობა მათი ხელწერაა. ეს პარტია ვერ ამაღლდა და ვერც ვერასდროს ამაღლდება „კუდის” სიმაღლიდან, ანუ მორალური და პოლიტიკური ფსკერიდან. მთავარია, რომ ქართული საზოგადოება კვლავაც კარგად არჩევს თეთრსა და შავს. ჩემი პატივისცემა ღირსეულ პრემიერს, ირაკლი ღარიბაშვილს და ღირსეული ოჯახის ღირსეულ შვილს, ბერა ივანიშვილს!!!“ – წერს ირაკლი კობახიძე.

ირაკლი კობახიძის განცხადებას თან ერთვის ირაკლი ღარიბაშვილისა და ბერა ივანიშვილის ერთობლივი ფოტო.

ფარულ ჩანაწერებთან დაკავშირებით დღეს განცხადება გაავრცელა „ქართულმა ოცნებამაც“, რომელშიც ნათქვამია, რომ ეს ჩანაწერები “კუდის” მიერაა მოპოვებული 2010-2011 წლებში და „მოლაპარაკებების ჩაშლის სურვილმა განაპირობა ჩანაწერების გამოქვეყნება“.

_______

გუშინ, 6 მარტს, “ტვ პირველმა” გაავრცელა აუდიოჩანაწერები, რომლებშიც, ტელეარხის ინფორმაციით, ამჟამინდელი პრემიერ-მინისტრი ირაკლი ღარიბაშვილი, ბიძინა ივანიშვილის ვაჟი ბერა ივანიშვილი და სახელმწიფო დაცვის სპეციალური სამსახურის უფროსი ანზორ ჩუბინიძე ერთმანეთთან ათანხმებენ, როგორ უნდა დაისაჯონ სოციალურ ქსელებში ბერა ივანიშვილის მისამართით დაწერილი უარყოფითი კომენტარების ავტორები.

მასალები გავიდა გადაცემაში “ნოდარ მელაძის შაბათი”. მელაძე ამბობს, რომ გადაცემის გუნდმა არ იცის ჩანაწერების შექმნის თარიღი და არც ის, თუ რა ვითარებაში ჩაწერეს ისინი, ვინაიდან წყაროს, რომელმაც მასალები ტელეარხს მიაწოდა, ეს დეტალები არ დაუკონკრეტებია. ტელეარხის ჟურნალისტების თქმით, ჯამში, მათ ხელში აღმოჩნდა 4 აუდიოფაილი, რომლებითაც “სსკ-ის რამდენიმე მუხლის დარღვევა დგინდება”. თავად აუდიოფაილების შინაარსიდან გამომდინარე, “ტვ პირველი” ვარაუდობს, რომ ჩანაწერები 2016 წლის მოვლენებს ასახავს.

აღნიშნული ჩანაწერების ავთენტურობა დადგენილი არ არის და ეთერში გასვლის შემდეგ მის შესახებ ჯერ არ უსაუბრიათ იმ პირებს, რომლებიც, სავარაუდოდ, საუბრის უშუალო მონაწილეები არიან.

„ნეტგაზეთმა“ პროკურატურას მიმართა კითხვით, აღნიშნულ ჩანაწერებზე დაიწყო თუ არა გამოძიება. პასუხი ჯერ არ მიგვიღია.

გადაბეჭდვის წესი


ასევე: