Batumelebi | ქობულეთის მერიის შენობაში ჭერი ჩამოინგრა ქობულეთის მერიის შენობაში ჭერი ჩამოინგრა – Batumelebi
RU | GE  

ქობულეთის მერიის შენობაში ჭერი ჩამოინგრა

ქობულეთის მერიის შენობაში, ერთ-ერთ სამუშაო ოთახში, ჭერის ნაწილი ჩამოინგრა, რის გამოც ორ ოთახში მუშაობის პროცესი პარალიზებულია. მერიის ინფორმაციით ინფრასტრუქტურის სამსახურის ოთახში ჭერი სამუშაო საათებში ჩამოინგრა, თუმცა შემთხვევის შედეგად არავინ დაშავებულა.

„მიმდინარე წლის პირველ მარტს სამუშაო საათების დროს ქობულეთის მუნიციპალიტეტის მერიის ადმინისტრაციული შენობის (ინფრასტრუქტურის სამსახურის) სამუშაო ოთახში ჭერის ნაწილი ჩამოინგრა. შემთხვევის შედეგად არავინ დაზარალებულა. ჭერის ჩამონგრევის საფრთხე ისევ არსებობს, რის გამოც მერიის ორ ოთახში მუშაობის პროცესი პარალიზებულია. აქედან გამომდინარე, დაუყოვნებლივ საჭიროა განხორციელდეს სამუშაო ოთახის აღდგენა-გამაგრების სამუშაოები,“ – აღნიშნულია ინფრასტრუქტურის სამსახურის წერილში.

5 მარტს ქობულეთის მერმა 2021 წლის ბიუჯეტით გათვალისწინებული სარეზერვო ფონდიდან 3 688 ლარი გამოყო სამუშაო ოთახის აღდგენა-გამაგრებისთვის.

სამუშაოებს მერია ტენდერის გარეშე შეისყიდის. მუნიციპალიტეტმა შესყიდვების სააგენტოს თანხმობისთვის უკვე მიმართა: „აღნიშნული შესყიდვის განხორციელების გარეშე საფრთხე ექმნება მერიის ფუნქციონირებას. შესაბამისად, შექმნილი ვითარება ზიანს მიაყენებს სახელმწიფო და საზოგადოებრივ ინტერესებს“.

მერიის ინფორმაციით, დაზიანებული ადგილების აღდგენა-გამაგრებას დაახლოებით 7 დღე დასჭირდება.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com