Batumelebi | კოვიდის ვაქცინას „სანოფი“ და Johnson & Johnson-ი საფრანგეთში დაამზადებენ კოვიდის ვაქცინას „სანოფი“ და Johnson & Johnson-ი საფრანგეთში დაამზადებენ – Batumelebi
RU | GE  

კოვიდის ვაქცინას „სანოფი“ და Johnson & Johnson-ი საფრანგეთში დაამზადებენ

ფრანგული კომპანია „სანოფი“ დაეხმარება Johnson & Johnson-ს Covid 19-ის ვაქცინის საფრანგეთში წარმოებაში.

Sanofi პარტნიორ ბრიტანულ კომპანია GSK-სთან ერთადაც მუშაობს Covid 19-ის სხვა, კანდიდატ ვაქცინაზე,  რომლის ცდის პირველი ეტაპიც დასრულდა და 22 თებერვალს კომპანიამ განაცხადა, რომ იწყება კლინიკური ცდების მეორე ეტაპი.

ცდები მოხალისეებზე ჩატარდება. Sanofi პასუხისმგებლობას იღებს ვაქცინის შემადგენლობასა და ჩამოსხმაზე ლიონთან ახლოს განთავსებულ ლაბორატორიაში. კომპანიის მიერ გავრცელებულ პრესრელიზში აღნიშნულია, რომ Sanofi თვეში ვაქცინის 12 მილიონი დოზის წარმოებას შეძლებს.

Sanofi-სა და GSK-ს ერთობლივი ვაქცინის პირველმა ცდებმა არასაკმარისი შედეგები აჩვენა ყველაზე ხანდაზმულ პაციენტებში. ვაქცინის ამ ვარიანტის დასამზადებლად რეკომბინირებული პროტეინების ტექნოლოგია გამოიყენება. „სანოფი“ იმედოვნებს, რომ ვაქცინის გავრცელებას 2021 წლის ბოლოს დაიწყებს. თავდაპირველად კომპანიაში ფიქრობდნენ, რომ ვაქცინის გამოყენება  2021 წლის ზაფხულისთვის იქნებოდა შესაძლებელი, მაგრამ პროცესი შეყოვნდა.

„სანოფის“ პრესრელიზში აღნიშნულია, რომ სურთ პრიორიტეტად აქციონ საკუთარი წარმოების სხვადასხვა კანდიდატი-ვაქცინის დამუშავება, რისი მიზანიც მცირე დროში რაც შეიძლება მეტი დოზის წარმოებაა.

Sanofi სხვა შემთხვევაშიც იყენებს საკუთარ საწარმოო რესურსსა და ინსტრუმენტებს კონკურენტებთან სათანამშრომლოდ. მაგალითად, 2021 წლის ზაფხულიდან ფრანკფურტში მდებარე Sanofi-ს ლაბორატორიებში დაამზადებენ  Pfizer-BioNTech-ის მიერ შემუშავებულ Covid 19-ის ვაქცინის 125 მილიონზე მეტ დოზას.

კომპანია Sanofi ამერიკულ კომპანია Translate Bio-სთან ერთადაც შეიმუშავებს კანდიდატ ვაქცინას, რომელიც ინფორმაციული რნმ ტიპის ვაქცინაა, რაც ნიშნავს, რომ ორგანიზმში გენეტიკური მასალის, ი-რნმ-ის შეყვანით მუშაობს, შეიცავს კორონავირუსის ე.წ. „წვეტოვანი“ ცილის შექმნის ინსტრუქციას. ეს ტექნოლოგიაა გამოყენებული Pfizer-BioNTech-ისა და Moderna-ს უკვე ნებადართულ ვაქცინებშიც.

საფრანგეთში ვაქცინაციის პროცესი უკვე დაწყებულია. ქვეყნის ჯანდაცვის სამინისტროს ინფორმაციით, Covid 19-ის ვაქცინის საშუალოდ 1 დოზა უკვე გაიკეთა 2 560 982-მა ადამიანმა.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com