დღეს, 15 თებერვალს, აჭარის მთავრობის სახლთან აქცია მიმდინარეობს, რომლის მონაწილეებს სხვადასხვა სოციალური მოთხოვნები აქვთ.
აქციის მონაწილეები რუსთაველის ქუჩის გადაკეტვას ცდილობენ, თუმცა პოლიცია მათ ტროტუარზე გადაყვანას ცდილობს.
აქციის მონაწილეებს აჭარის მთავრობის თავმჯდომარესთან, თორნიკე რიჟვაძესთან შეხვედრა უნდოდათ ჟურნალისტების თანდასწრებით, თუმცა რიჟვაძე მათ არ შეხვდა.
აქციაში მონაწილეობენ მოქალაქეები „ოცნების ქალაქიდან“, რომლებიც აცხადებენ, რომ ის კორპუსები, რომლებსაც მთავრობა აშენებს, საკმარისი არ არის სოციალურად დაუცველი ყველა ოჯახის დასაკმაყოფილებლად; ასევე: თურქეთთან საზღვრის ჩაკეტვის შედეგად უმუშევრად დარჩენილები; თვითდასაქმებულები, რომელთაც პანდემიის გამო სამსახური დაკარგეს და მოქალაქეები, რომლებიც აცხადებენ, რომ თავშესაფარი არ აქვთ.
