Batumelebi | საქართველოში ქალები კაცებზე საშუალოდ 8 წლით მეტხანს ცოცხლობენ საქართველოში ქალები კაცებზე საშუალოდ 8 წლით მეტხანს ცოცხლობენ – Batumelebi
RU | GE  

საქართველოში ქალები კაცებზე საშუალოდ 8 წლით მეტხანს ცოცხლობენ

საქართველოს სტატისტიკის ეროვნული სააგენტოს ცნობით, სიცოცხლის მოსალოდნელი ხანგრძლივობა დაბადებისას ქალებში – 78.4 წელი, კაცებში კი – 69.8 წელია.

საქსტატი ეყრდნობა 2009 -2019 წლის სტატისტიკურ მაჩვენებლებს საქართველოში ქალისა და კაცის სიცოცხლის მოსალოდნელ ხანგძლივობაზე. მონაცემები საქართველოს ეროვნულმა სააგენტომ სტატისტიკურ პუბლიკაციაში – „ქალი და კაცი საქართველოში“ გამოაქვეყნა.

საქართველოში სიცოცხლის მოსალოდნელი ხანგრძლივობა დაბადებისას აღემატება დსთ-ს მაჩვენებელს და ნაკლებია ევროპის რეგიონის მაჩვენებელზე.

ევროპის რეგიონში ქალის სიცოცხლის საშუალო ხანგრძლივობა 80 წელს აღემატება, კაცისა კი – 70 წელს.

საქსტატის პუბლიკაციაში აღნიშნულია, რომ ვაშინგტონის უნივერსიტეტის ჯანმრთელობის გაზომვების და შეფასების ინსტიტუტის პროგნოზით, რომელიც ეყრდნობა ავადობის გლობალური ტვირთის 2017 წლის მონაცემებს, საქართველოში სიცოცხლის მოსალოდნელი ხანგრძლივობა ზრდის ტენდენციას შეინარჩუნებს.

ამავე ინსტიტუტის პროგნოზის თანახმად, 2100 წლისთვის საქართველოში ქალის სიცოცხლის საშუალო ხანგრძლივობა 85.7 წელს მიაღწევს, კაცის კი – 78.2 წელს.

აჭარაში ყველაზე ხანდაზმული ადამიანი ქალია, 115 წლის ფიქრიე ირემაძე.

ბოლო მონაცემებით, აჭარაში ას წელს გადაცილებული 48 მოქალაქეა, მათ შორის 46 ქალი და 2 კაცია.

____________

ფოტო „ბათუმელების“ არქივიდან

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com