ბათუმში, ევროპის მოედანზე, საახალწლო ნაძვის ხესთან არასამთავრობო ორგანიზაცია „სანშაინის“ მოხალისეები სოციალურად დაუცველი და უსახლკარო ადამიანებისთვის თბილ ტანსაცმელს აგროვებენ.
„სანშაინის“ თავმჯდომარე ედო მჟავანაძე ამბობს, რომ აქცია მეორე დღეა მიმდინარეობს და ჯერჯერობით მათ უფრო მეტმა ბენეფიციარმა მიმართა, ვიდრე დახმარების მსურველმა და მხოლოდ მცირე რაოდენობით თბილი ტანსაცმელი შეგროვდა.
„ვაგროვებთ თბილ ტანსაცმელს იმ ადამიანებისთვის, ვისაც სჭირდება დახმარება. 27 დეკემბერს, 12-დან 3 საათამდე შეგიძლიათ მობრძანდეთ და მოიტანოთ თბილი, კარადაში ჩამალული ტანსაცმელი, რომელიც უკვე დაგავიწყდათ და არ იყენებთ. მოიტანეთ და გაათბეთ ადამიანები.
უკვე მეორე დღეა აქ ვართ, შედარებით ცოტა ტანსაცმელია მოტანილი, მაგრამ იმედს არ ვკარგავთ, ხვალ ველოდებით ძალიან ბევრ ტანსაცმელს. ჩვენ გვაქვს ბაზა იმ ადამიანების, ვინც დახმარებას საჭიროებს, მაგრამ 15-მდე ადამიანი მოვიდა უკვე ჩვენთან და გვთხოვა დახმარება. მათი მონაცემები ჩავიწერეთ და როდესაც ტანსაცმლის დარიგებას დავიწყებთ, მათაც აუცილებლად დავუკავშირდებით“, – ამბობს ლელა ცინარიძე, არასამთავრობო ორგანიზაცია „სანშაინის“ მოხალისე.
მსგავი ტიპის საქველმოქვედო აქციას ორგანიზაცია მეხუთედ მართავს.
საქველმოქმედო აქცია ევროპის მოედანზე
