17 დეკემბრის მონაცემებით, საქართველოში კორონავირუსით ინფიცირებულთა რაოდენობა 200 ათასს აღემატება.
26 თებერვლიდან 17 დეკემბრამდე ქვეყანაში კოვიდით ინფიცირდა 201 368 ადამიანი, მათგან 1953 ადამიანი გარდაიცვალა, 169 282 კი უკვე გამოჯანმრთელდა.
200 ათასს აჭარბებს მხოლოდ დადასტურებული შემთხვევების რაოდენობა. გარდა ამისა, არის ათასობით პაციენტი, რომელთაც ტესტი კორონავირუსზე არ ჩატარებიათ, თუმცა, სავარაუდოდ, მათ ასევე ჰქონდათ ან აქვთ კორონავირუსი.
კორონავირუსის პირველი შემთხვევა საქართველოში 2020 წლის 16 თებერვალს დაფიქსირდა, თვეების განმავლობაში იყო ერთეული და ათეული შემთხვევები, თუმცა კოვიდის ეპიდაფეთქება დაიწყო 2020 წლის სექტემბერში, ბათუმში, „დონას კლასტერთან“ დაკავშირებული შემთხვევებით.
სექტემბრიდან ბოლო დრომდე ბათუმი და აჭარა საქართველოს კოვიდ რუკაზე ყველაზე ცხელი წერტილი იყო, თუმცა ამჟამად აჭარაში შეინიშნება ახალი შემთხვევების კლება.
დღეისათვის კორონავირუსის ყველაზე მეტი ახალი შემთხვევა ვლინდება თბილისსა და იმერეთის რეგიონში.
ჯონს ჰოპკინსის უნივერსიტეტის დღევანდელი, 17 დეკემბრის მონაცემებით, საქართველო მსოფლიოში 43-ე ადგილზეა კოვიდის გავრცელების სტატისტიკით და უსწრებს სომხეთსა და აზერბაიჯანს.
