ნეტგაზეთი • RU

გადადგება თუ არა არჩილ ხაბაძე თანამდებობიდან

აჭარის მთავრობის თავმჯდომარე, არჩილ ხაბაძე დღეს, 24 დეკემბერს სამსახურში არ იმყოფება. ქვეყნის პრემიერის გადადგომის შემდეგ ხომ არ აპირებს თანამდებობის დატოვებას არჩილ ხაბაძეც?

საქართველოს და აჭარის კონსტიტუცია არ ითვალისწინებს აჭარის მთავრობის თავმჯდომარის ავტომატურად გადადგომას, იმ შემთხვევაში თუ თანამდებობას ქყვეყნის პრემიერი. თუმცა, იმის გათავალისწინებით, რომ არჩილ ხაბაძე ითვლებოდა პრემიერ-მინისტრ ირაკლი ღარიბაშვლის გუნდის წევრად, არ არის გამორიცხული ახალი პრემიერის მოსვლის შემდეგ მისი გადადგომის საკითხიც დადგეს დღის წესრიგში.

აჭარის მთავრობის პრესამსახურში ადასტურებენ „ბათუმელების“ ინფორმაციას, რომ არჩილ ხაბაძე დღეს სამსახურში არ იმყოფება. პრესსამსახურის ცნობით, ის „წასულია გიორგი კვირიკაშვილის ოჯახის წევრის სამძიმარში“.

არაოფიციალური ინფორმაციით, ირაკლი ღარიბაშვილს ქვეყნის პრემიერ-მინისტრის თანამდებობაზე სწორედ გიორგი კვირიკაშვილი ჩაენაცვლება.

ქვეყნის პრემიერ-მინისტრი, ირაკლი ღარიბაშვილი გუშინ, 23 დეკემბერს საკუთარი განცხადების საფუძველზე გადადგა თანამდებობიდან.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.