მთავრობის 2020 წლის 15 დეკემბრის განკარგულებით, საქართველოში COVID 19-ის ვაქცინაციის დანერგვის უწყებათაშორისი საკოორდინაციო კომისია შეიქმნა.
კომისიამ უნდა შეიმუშაოს COVID 19-ის ვაქცინაციის დანერგვის ეროვნული სამოქმედო გეგმა უწყებათაშორის საკოორდინაციო საბჭოსთან მჭიდრო კოორდინაციით და საჭიროებისამებრ განაახლოს იგი. კომისიამ ასევე უნდა უზრუნველყოს ამ სამოქმედო გეგმის შესრულების კოორდინაცია და მონიტორინგი.
კომისიაში შედიან:
- საქართველოს ჯანდაცვის მინისტრი – კომისიის თავმჯდომარე;
- ჯანდაცვის მინისტრის პირველი მოადგილე – კომისიის თავმჯდომარის მოადგილე;
- საქართველოს ფინანსთა მინისტრის მოადგილე – კომისიის წევრი;
- საქართველოს ეკონომიკისა და მდგრადი განვითარების მინისტრის მოადგილე – კომისიის წევრი;
- საქართველოს საგარეო საქმეთა მინისტრის მოადგილე – კომისიის წევრი;
- სსიპ − ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი − კომისიის წევრი;
- სსიპ − სამედიცინო და ფარმაცევტული საქმიანობის რეგულირების სააგენტოს დირექტორი − კომისიის წევრი;
- სსიპ − ჯანმრთელობის ეროვნული სააგენტოს დირექტორი − კომისიის წევრი;
- სსიპ − საგანგებო სიტუაციების კოორდინაციისა და გადაუდებელი დახმარების ცენტრის დირექტორი − კომისიის წევრი;
- სსიპ – თბილისის სახელმწიფო სამედიცინო უნივერსიტეტის რექტორი − კომისიის წევრი;
- საქართველოს სახალხო დამცველი − კომისიის წევრი;
- საქართველოს ბიოეთიკის ეროვნული საბჭოს თავმჯდომარე − კომისიის წევრი.
მთავრობის განკარგულებით კომისიის მუშაობაში წევრის სტატუსით მონაწილეობა ეთხოვათ:
- ჯანმრთელობის მსოფლიო ორგანიზაციის ქვეყნის წარმომადგენლობას;
- გაეროს ბავშვთა ფონდის ქვეყნის წარმომადგენლობას;
- აზიის განვითარების ბანკის ქვეყნის მისიას;
- მსოფლიო ბანკის ქვეყნის წარმომადგენლობას;
- გაეროს განვითარების პროგრამის წარმომადგენლობას;
- ევროკავშირის საქართველოს წარმომადგენლობას;
- აშშ-ის საერთაშორისო განვითარების სააგენტოს.
„მიმდინარეობს პარალელური პროცესი სამთავრობო არხებით, რომ გარკვეული, დამტკიცებული მარეგულირებლების მიერ ერთ-ერთი ვაქცინა შემოტანილი იქნეს უფრო ადრე, იანვრის ბოლოს, თებერვლის დასაწყისში, 200 ათასიდან 300 ათას დოზამდე, რომ უფრო ადრე დაიწყოს ვაქცინაცია,“ – განაცხადა 8 დეკემბერს გამართულ ბრიფინგზე დაავადებათა კონტროლის ეროვნული ცენტრის დირექტორმა, ამირან გამყრელიძემ.
ამირან გამყრელიძის ინფორმაციით, თავდაპირველად რისკის ჯგუფებს აცრიან, ხოლო „კოლექტიური იმუნიტეტის“ მისაღწევად საჭიროა მოსახლეობის დაახლოებით 60 პროცენტი აიცრას.
ამ თემაზე:
კოვიდზე აცრა შესაძლოა საქართველოში იანვრის ბოლოს დაიწყოს – გამყრელიძე