Batumelebi | რატომ დატოვა საქართველოს რკინიგზამ მგზავრები ბაქანზე – კომპანიის განმარტება რატომ დატოვა საქართველოს რკინიგზამ მგზავრები ბაქანზე – კომპანიის განმარტება – Batumelebi
RU | GE  

რატომ დატოვა საქართველოს რკინიგზამ მგზავრები ბაქანზე – კომპანიის განმარტება

ბათუმი-თბილისის სამგზავრო მატარებელი გუშინ, 22 ნოემბერს, 25 წუთით [15:25-ის ნაცვლად გავიდა 15:00 საათზე] ადრე გავიდა, რის გამოც ზოგიერთმა მგზავრმა გამგზავრება ვეღარ მოახერხა. საქართველოს რკინიგზა აცხადებს, რომ შეცვლილი გრაფიკის შესახებ ინფორმაცია კომპანიის ოფიციალურ გვერდზე განათავსა, თუმცა ამის შესახებ მგზავრები ინფორმირებულნი არ იყვნენ.

„ვისაც ადრე ჰქონდა ბილეთები აღებული და არ ჰქონდათ ინფორმაცია გრაფიკის შეცვლაზე, სალაროებში გაფრთხილებული არიან და პრობლემა არ შეექმნებათ ბილეთების დაბრუნებაზე. ბილეთის საფასური 100 პროცენტით დაუბრუნდებათ“, – გვითხრეს საქართველოს რკინიგზაში.

საქართველოს რკინიგზის მიერ 9 ნოემბერს გავრცელებულ განცხადებაში ბათუმი-თბილისის სადგურიდან მატარებლის გასვლის დროდ 15:25 საათია დაფიქსირებული. განრიგის ცვლილებასთან დაკავშირებით ბოლო ინფორმაცია რკინიგზას 19 ნოემბერს აქვს გამოქვეყნებული, სადაც წერია, რომ მატარებელი ბათუმი-თბილისი სადგურიდან 20 ნოემბერს 15:00 საათზე გავა.

საქართველოს რკინიგზაში ასევე გვითხრეს, რომ გარდა რკინიგზის ოფიციალურ გვერდზე განცხადების განთავსებისა, მათ მგზავრების ინფორმირებისთვის სხვა ალტერნატიული გზა არ აქვთ, მათ შორის არც სმს-ს შეტყობინებები.

„ჩვენ ხელი არ მიგვიწვდება მგზავრების ტელეფონის ნომრებზე, საინფორმაციო საშუალებები იმიტომ არსებობს, რომ ამით უნდა გავავრცელოთ ინფორმაცია. სმს-ების გაგზავნა ფიზიკურად წარმოუდგენელია, რადგან ეს არის პერსონალური ინფორმაცია და მასზე ხელი არ მიგვიწვდება“, – გვითხრეს „საქართველოს რკინიგზაში“.

რკინიგზაში ზუსტად ვერ გვითხრეს, რამდენი მგზავრი დარჩა ბაქანზე განრიგის ცვლილების შესახებ ინფორმაციის არქონის გამო. „ეს ინფორმაცია გვექნება მაშინ, როცა მგზავრები ბილეთებს დააბრუნებენ“, – ამბობენ რკინიგზაში.

კომპანიაში ასევე დასძენენ, რომ „პანდემიის დროს მატარებლის ბილეთების გაყიდვა გამგზავრებამდე 20 დღით ადრე ხდება, სწორედ ამ გარემოების გათვალისწინებით, კომპანია მზად არის ყველა მგზავრს ბილეთის დაბრუნების შემთხვევაში თანხის 100 პროცენტი დაუბრუნოს“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com