„საპროტესტო აქციის მონაწილეები პოლიციის კანონიერი მოთხოვნის დაუმორჩილებლობის გამო დავაკავეთ“, – ამბობს „ბათუმელებთან“ კოტე ანანიაშვილი, აჭარის პოლიციის დეპარტამენტის უფროსი. მისი თქმით, ბათუმის საოლქო კომისიის წინ მოწყობილ საპროტესტო აქციაზე სულ 5 პირი დააკავეს.
კოტე ანანიაშვილის თქმით, აქციის მონაწილეები ადმინისტრაციულ სამართალდარღვევათა კოდექსის 173-ე მუხლის შესაბამისად დააკავეს.
კოტე ანანიაშვილი არ აკონკრეტებს, კონკრეტულად პოლიციის რა მოთხოვა არ შეასრულეს აქციის მონაწილეებმა. „ეს პოლიციის შესაბამის ოქმებში იქნება ასახული, ახლა ამ დეტალებს ვერ გეტყვით“, – აღნიშნა კოტე ანანიაშვილმა.
საპროტესტო აქცია ბათუმის საოლქო კომისიასთან პოლიციამ რამდენიმე წუთის წინ დაშალა.
ორგანიზაცია „ალტერნატივამ“ ე.წ. სირცხვილის კორიდორი ბათუმის საოლქო კომისიასთან ამ საღამოს მოაწყო, როცა საუბნო კომისიების წარმომადგენლებს შემაჯამებელი ოქმები საოლქო კომისიაში მიჰქონდათ. ისინი „საუბნო კომისიის წევრებს ხვდებოდნენ შეძახილებით „მონებო“, „მოღალატეებო“, სირცხვილია“.
__
დღეს, 21 ნოემბერს, დასრულდა საპარლამენტო არჩევნების მეორე ტური, თუმცა ამ არჩევნებში ოპოზიცია არ მონაწილეობდა. ოპოზიციას მიაჩნია, რომ 31 ოქტომბრის საპარლამენტო არჩევნების შედეგები გაყალბებულია. შესაბამისად, 8 პარტია უარს აცხადებს საპარლამენტო მანდატებზე.
ამ თემაზე:
