Batumelebi | ბათუმის ბავშვთა საავადმყოფოში 6 წლის ბავშვი გარდაიცვალა ბათუმის ბავშვთა საავადმყოფოში 6 წლის ბავშვი გარდაიცვალა – Batumelebi
RU | GE  

ბათუმის ბავშვთა საავადმყოფოში 6 წლის ბავშვი გარდაიცვალა

ბათუმის დედათა და ბავშვთა ჯანმრთელობის დაცვის ცენტრში 15 დეკემბერს  ქუნთრუშას დიაგნოზით 6 წლის ბავშვი დაიღუპა. ბავშვი შუახევის სოფელ მაწყვალთიდან სამედიცინო ცენტრში გადაყვანის შემდეგ ხუთ საათში გარდაიცვალა.

აჭარის საზოგადოებრივი ჯანდაცვის ცენტრის დირექტორის მოადგილის ნინო ნიჟარაძის თქმით, გარდაცვლილ ბავშვს ოჯახის ექიმის მიერ წითელას დიაგნოზი ჰქონდა დადგენილი, თუმცა ბათუმის დედათა და ბავშვთა ცენტრში მძიმე სეფტიურ-ტოქსიური შოკით ქუნთრუშა დაუდგინეს.

ანგისაში მდებარე დედათა და ბავშვთა ჯანმრთელობის დაცვის ცენტრში 15 დეკემბერს გარდაცვლილი ბავშვის ოჯახიდან კიდევ ორი მცირეწლოვანი მიიყვანეს,  მაღალი სიცხითა და ოტიტით (ყურის ანთებით).

„ორივე მათგანს ამბულატორიული დანიშნულება მიეცა“, – უთხრა ნინო ნიჟარაძემ „ბათუმელებს“.

მისივე ინფორმაციით, ბავშვები სახლში გადაიყვანეს და მათ სიცოცხლეს საფრთხე არ ემუქრება.

„ადგილზე, მაწყვალთაში ჩვენი ორგანიზაციის შუახევის განყოფილება იყო ორჯერ გასული. დღეს სკოლას ჩაუტარდა დეზინფექცია. აღვწერეთ კლასი, სადაც 14 ბავშვი სწავლობს, ისინი ჯანმრთელები არიან და არანაირი კლინიკური გამოვლინება არ აქვთ, მიეცათ რეკომენდაციები მშობლებსა და სკოლას. ქუნთრუშა ჰაერწვეთოვანი, ბაქტერიული ბუნების ინფექციაა და საჭიროებს, მაგალითად, ოთახების ხშირად განიავებას. ასევე, აუცილებლად გასათვალისწინებელია, რომ თუ ბავშვს რაიმე ჩივილები დაეწყება,  დროულად მოხდეს ექიმთან მიმართვა“ – უთხრა „ბათუმელებს“ ნინო ნიჟარაძემ.

 

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი