შინმოვლის საჭიროების მქონე ბენეფიციართა დახმარებისა და მომსახურეობის ქვეპროგრამა გრძელდება. პროგრამა გულისხმობს სახლის პირობებში, სოციალურად დაუცველ, საწოლს მიჯაჭვულ მოხუცებულ პირთა და შშმ პაციენტთათვის სამედიცინო და სოციალური სერვისების მიწოდებას.
მომსახურება მოიცავს კვირაში ორჯერ ექიმის, ექთნის, რეაბილიტოლოგის მიერ ჰიგიენურ და სამედიცინო მოვლას, აუცილებელი მედიკამენტებითა და ჰიგიენური საშუალებებით უზრუნველყოფას.
ზემოაღნიშნული სერვისების მიწოდება ხდება მულტიდისციპლინარული ჯგუფის მიერ. პროგრამით 90 ბენეფიციარი სარგებლობს, რისთვისაც ქალაქის ბიუჯეტიდან 63 700 ლარია გამოყოფილი.
ბათუმის მერიის ჯანმრთელობისა და სოციალური დაცვის სამსახურის უფროსის მოადგილის მარინე რუხაძის თქმით, ყოველკვირეულად ხდება პაციენტებისათვის ინდივიდუალური გეგმის შედგენა და საჭიროების შემთხვევაში სხვადასხვა ექიმ-სპეციალისტთა ჩართვა. პროგრამის სრულყოფის მიზნით დგება კმაყოფილების კითხვარი, რის შედეგადაც ხდება პროგრამაში ცვლილებების შეტანა.
